Majarstanda kóshpendiler oıynynan saıys ótti

BÝDAPEShT. QazAqparat - Majarstanda kóshpendi halyqtardyń ulttyq sport túrlerinen halyqaralyq saıys ótti. Oǵan qatysqandar at jarys, jekpe-jek, qashyqtan sadaq atý, semserlesý syndy kóshpendiler oıyndarynyń 10 túrinen óner kórsetti, dep habarlaıdy QazAqparat.

Jarysqa kelgender majarlardyń ulttyq suńqar ushyrý dástúrin tamashalap, kóshpendi turmysqa qatysty fotokórme, kıiz úı jabdyqtary men qarý-jaraq túrimen tanysty.

Іs-shara «Majar-Turan» qory qurǵan Ulttyq sport túrleri qaýymdastyǵy men Majarstandaǵy «Sadaqshylar joly» mektebiniń uıymdastyrýmen ótti. Sharanyń negizgi maqsaty – kóshpendiler murasyn saqtaý ári ony qaıta jańǵyrtý. Kóshpendiler rýhy men sportyn dáripteıtin sharanyń ashylý saltanatynda Albertırsha qalasynyń meri Fazekash Laslo men «Majar-Turan» qorynyń prezıdenti Andrash Bıro sóz sóılep, qatysýshylar men kórermenderdi quttyqtady. Sonymen qatar saıystyń saltanatty ashylýyna Qazaqstannyń Majarstandaǵy Elshiligi ókilderi qatysty.

Eki kúnge sozylǵan sharada qonaqtar nazaryna kóshpendiler úlgisimen sándelgen kıiz úıler, ata-babalarymyzdyń ómir salty men qarý-jaraq óneri jaıly kórme usynyldy. Sondaı­-aq, shara qonaqtary kóshpendilerdiń kıim kııý ereksheligi, at ábzel túrleri men ózge de qural-jabdyqtarmen tanysystyryldy. Júırik attar men órkeshti túılere qonaqtardy tánti etti. Baǵdarlama aıasynda kórermenderge qus salý, soǵys óneri men qarý-jaraq túrleri, kókpar tartý, at sporty tóreligi boıynsha qoıylymdar usynyldy. Sondaı-aq, dástúrli qolóner buıymdary qoıylǵan jármeńke uıymdastyryldy.

Іs-shara sońynda jeńimpazdarǵa arnaıy kýbok, medaldar men baǵaly syılyqtardy «Majar-Turan» qorynyń prezıdenti Andrash Bıro tabys etti.

Aıta keteıik, 13-15 tamyz kúnderi Majarstan astanasy Býdapesht mańyndaǵy Býgats qalashyǵynda, «Majar-Turan» halyqaralyq qorynyń uıymdastyrýymen, dástúrli «Babalar kúni» (Ösök Napja) sharasy ótedi. Sharanyń maqsaty – erte túrki-ǵun mádenıetin jańǵyrtý, salaǵa ǵylymı ortany tartý.

Aıta keterligi, Qazaqstan men Majarstan arasyndaǵy qatynas egemendik alǵan tusymyzda bastaldy. Bul – Qazaq eliniń táýelsizdigin moıyndaǵan alǵashqy memleketterdiń biri. Qazaqstannyń Eýropalyq Odaqpen yntymaqtastyǵynyń jańa deńgeıge shyǵýy eki el arasyndaǵy dıplomatııalyq qatynastardy nyǵaıta tústi. El astanasy Býdapeshtte mádenı-gýmanıtarlyq baǵyttaǵy sharalar jıi uıymdastyrylady. Býdapeshtte Astana kóshesi, Abaı eskertkishi bar, Abaı oqýlary jıi ótedi, Majarstandaǵy QR Elshiligi janynda «Abaı ortalyǵy» jumys istep tur. Eki el arasyndaǵy mádenı, ǵylymı baılanystar arqasynda jyl saıyn 250 jas qazaqstandyq bilimin Majarstanda jetildirý múmkindigine ıe.