Majarstan parlamentiniń spıkeri qazaq kıiz úıinen dám tatty

 ASTANA. QazAqparat - Osy kúnderi Vengrııanyń Býgats qalasynda  ótip jatqan «Turan» halyqtarynyń quryltaıynda túrki tildes elder ózderiniń ulttyq kıiz úılerin tikti, dep habarlaıdy QazAqparat tilshisi.

Qazaqstan tikken 12 qanatty kıiz úıdiń syrtqy jáne ishki saltanaty da kelisti. Sondyqtan da quryltaı qonaqtarynyń nazaryn birden ózine aýdardy. Qazaqtardyń ulttyq baspanasyna bas suqqan árbir kelýshige shaǵyn syılyq, kıiz úı túrindegi qorapqa salynǵan táttiler berildi. Qonaqtarǵa arnalǵan dámdi quramynda 60-qa jýyq adam bar qazaqstandyq delegatsııa arnaıy daıyndaǵan. Quryltaıdyń eki kúniniń ishinde myńnan astam sarqyt taratyldy.

Aqtóbe oblysynyń ákimi Berdibek Saparbaevtyń arnaıy shaqyrýymen Vengrııa Ulttyq jınalysynyń spıkeri Laslo Kever qazaq úıge qonaqqa keldi. Qazaqtyń qonaqjaılyq dástúrine sáıkes mártebeli meımanǵa qymyz ben baýyrsaq usynyldy. Munan bólek, qazaq kıiz úıinde quryltaıǵa kelgen ózge de resmı tulǵalar boldy.

Aıta keteıik, 11 tamyz kúni Vengrııanyń Býgats qalasynda «Turan» halyqtarynyń 10-shy halyqaralyq quryltaıy bastaldy. Sharaǵa 30-dan astam el men halyqtyń delegatsııalary qatysýda. Quryltaı «Turan» ejelgi jaýyngerleri sherýiniń jańartylǵan saltanatymen ashyldy. Halyqaralyq sharaǵa qatysýshylar  aldynda Vengrııa parlamentiniń sıpkeri Laslo Kever sóz sóıledi. Al Aqtóbe oblysynyń ákimi Berdibek Saparbaev óz quttyqtaýynda osynaý qyzyqty ári joǵary deńgeıde uıymdastyrylǵan sharaǵa uıytqy bolǵandarǵa rızashylyǵyn bildirdi.

Sonymen qatar Berdibek Saparbaev quryltaıǵa Qazaqstan Prezıdentiniń tapsyrmasymen kelgenin aıtty. Qazaqstan men Vengrııa arasyndaǵy tarıhı, mádenı jáne ekonomıkalyq baılanystardyń jyldan jylǵa tereńdep, nyǵaıa túsip kele jatqandyǵyn atap ótti. Munan bólek, qatysýshylardy kelesi jyly Qazaqstanda quryltaı ótkizýge shaqyrdy. Sóz sońynda «Madııar Turan» qoryna Aqtóbe oblysynyń atynan qazaqtyń kıiz úıin tartý etti.