Máıit satý: sýdıa Garvard medıtsınalyq mektebine qarsy talapty qanaǵattandyrýdan bas tartty

<p>ASTANA. KAZINFORM &ndash; Dúısenbide Massachýsets shtatynyń sýdıasy Garvardty jaqyndarynyń máıitterine durys qaramady dep aıyptaǵan otbasylardyń talabyn oryndaýdan bas tartty. Adam máıitteri medıtsına mektebine syıǵa tartylyp, keıin máıithananyń burynǵy meńgerýshisi olardy qara bazarda satyp jibergen, dep habarlaıdy<a href="https://www.reuters.com/legal/harvard-wins-dismissal-families-lawsuits-over-morgue-scandal-2024-02-12/" target="_blank" rel="noopener"> Reuters.&nbsp;</a></p>

Otbasy zańgerleri Garvard ýnıversıtetin selqostyq tanydy dep aıyptap, máıithananyń burynǵy meńgerýshisi Sedrık Lodjdyń áreketterine uzaq jyldar boıy kóz juma qaraǵany úshin ony jaýapqa tartýdy kózdedi.

«Talapkerlerdiń aıtýynsha, Garvard medıtsınalyq mektebiniń máıithanasyn qadaǵalaýǵa nemquraılylyq tanytyp, sony paıdalanǵan Lodj uzaq jyldar boıy dene bólikterin urlaý múmkindigine ıe bolsa da, bul jaǵdaıda Garvardtyń jaýapkershilikten qutylýy ádiletsiz bolyp kórinýi múmkin», - dep jazdy sýdıa.

Onyń aıtýynsha, Garvard adam denesin zertteý jáne bilim berý úshin ony syıǵa tartýdy retteıtin Adam organdaryn transplantatsııalaý úshin syıǵa tartý týraly biryńǵaı zańdy (Uniform Anatomical Gift Act) adal oryndaýǵa umtylǵan kezde onyń jaýapkershilikke tartylmaý ımmýnıteti bar.

Sotqa aryz maýsym aıynda federaldy prokýrorlar Lodjǵa jáne taǵy bes adamǵa aıyp taqqan soń túsirildi. Olarǵa Garvard medıtsınalyq mektebi men Arkanzastaǵy máıithanadan urlanǵan adam súıekterin satyp alyp, satty degen aıyp taǵylyp otyr.

Prokýrorlardyń aıtýynsha, 2018-2022 jyldary Lodj áleýetti satyp alýshylarǵa máıitterdi kórý jáne satyp alǵysy kelgen bólikterdi tańdaý úshin mektep máıithanasyna barýǵa ruqsat bergen.

Prokýrorlar sonymen qatar Lodj máıitterden urlanǵan aǵzalardy óz úıine jetkizip, áıeli ekeýi basqalarǵa satqanyn aıtty. Alaıda olar urlanǵan aǵzalardy memleketaralyq tasymaldaý jáne sóz baılasý boıynsha kinásin moıyndamady jáne 5 tamyzda sot aldynda jaýap beredi.