Maısham, azyq-túlik, aýyzsý: Qysta jolǵa shyqqanda kólikte qandaı zattar bolý kerek

<p>ASTANA. KAZINFORM &ndash; Tótenshe jaǵdaılar mınıstrligi Tótenshe jaǵdaılardy joıý departamentiniń bas mamany Dıdar Qajykenov qysta jolǵa shyqqanda kólikte qandaı zattar bolý keregin túsindirdi.</p>

- Qysta jolǵa shyqpaı turyp kóliktiń tehnıkalyq turǵyda jaramdylyǵyn tekserý kerek. Maıyn aýystyrý sııaqty sharalardyń bárin kez kelgen júrgizýshi bilýi kerek. Odan keıin máshınede mindetti túrde maısham jáne basqa da jylytý quraldary bolý qajet. Turmystyq jaǵdaıda qoldanylatyn kez kelgen jylytý quraly jaramdy. Birinshi kezekte azyq-túlik pen aýyzsý bolǵany durys, - dedi Dıdar Qajykenov.

TJM mamany jolǵa shyqpaı turyp, aýa raıy týraly resmı málimetterdi esepke alýdyń mańyzy zor ekenin eskertti.

- «112» nómirinen keletin SMS habarlamalar bar. Olardy eskerýsiz qaldyrýǵa bolmaıdy. «Dármen» qosymshasy bar. Osy qosymsha arqyly «QazAvtoJoldyń» resmı saıtyna kirip, qaı joldyń ashyq nemese jabyq ekenin kórýge bolady. Al jolǵa shyǵyp ketken bolsańyz, jol boıyndaǵy jylytý pýnktterine júgingen durys. Sol oryndarda aýa raıynyń jaqsarǵanyn kútý kerek, - dedi ol.

Aıta ketý kerek, keıingi 5 kúnde TJM ókilderi jolda qalǵan 199 adamdy qutqaryp, 270 adamdy jylytý beketine aparǵan.