Maımyl sheshegine qatysty tótenshe jaǵdaı rejımi aıaqtaldy – DDSU basshysy

JENEVA. TASS – QazAqparat – Dúnıejúzilik densaýlyq saqtaý uıymynyń (DDSU) bas dırektory Tedros Adanom Gebreıesýs álemde mpox («empoks» - maımyl shesheginiń jańa ataýy) syrqaty boıynsha tótenshe jaǵdaı rejımi aıaqtalǵanyn málim etti. Jenevada ótken brıfıngide sóz sóılegen uıym basshysy mundaı sheshim syrqattar sany 2022 jyldyń shildesimen salystyrǵanda aıtarlyqtaı azaıǵannan keıin qabyldanǵanyn aıtty. Dál sol kezde álemdik densaýlyq saqtaý júıesinde tótenshe jaǵdaı rejımi engizilgen edi. QazAqparat bul týraly TASS-qa silteme jasap habarlaıdy.

«Mpox-pen baılanysty tótenshe jaǵdaı jónindegi komıtet kóptegen elderde tirkelgen mpox budan bylaı halyqaralyq alańdaýshylyq týdyratyn tótenshe jaǵdaı emestigin maǵan jetkizip, usynys kóterdi. Men bul usynyspen kelistim jáne mpox endi densaýlyq saqtaýda tótenshe jaǵdaı emestigin qýana habarlaımyn», - dedi T.Gebreıesýs.

Onyń aıtýynsha, keıingi úsh aıda maımyl sheshegin juqtyrǵandar sany onyń aldyńǵy úsh aımen salystyrǵanda 90% jýyq az bolǵan.

DDSU bas dırektory atalǵan indettiń órshýine qarsy «elderdiń shuǵyl áreket etýin» joǵary baǵalady.

Dúnıejúzilik densaýlyq saqtaý uıymyna 111 memleketten mpox-ke shaldyǵýdyń 87 myńnan astam jaǵdaıy men ólim-jitimniń 140 oqıǵasy týraly aqparat túsken.

Uıym basshysy atap ótkendeı, mpox boıynsha tótenshe jaǵdaı rejıminiń alynýy «jumystyń aıaqtalǵanyn bildirmeıdi».