Maımyl sheshegine qarsy vaktsınaǵa suranys artty

NUR-SULTAN. QazAqparat - Maımyl sheshegine qarsy vaktsına EO, Kanada jáne AQSh-ta qoldanýǵa ruqsat etilgen jalǵyz fırma danııalyq Bavarian Nordic kompanııasy preparatqa degen suranysty qanaǵattandyra almaýy múmkin.

Bul týraly QazAqparat QR Úkimeti janyndaǵy Qazaqstanda koronavırýstyń taralýyna jol bermeý jónindegi vedomstvoaralyq komıssııasynyń Telegram kanalyna silteme jasap habarlaıdy.

«Vaktsınaǵa degen suranys ınfektsııany juqtyrýshylar sanynyń artýyna baılanysty ósýde. Danııadaǵy óndiristik alańymyzdy jańǵyrtqannan keıin de biz ony tolyq kólemde qanaǵattandyra alatynymyzǵa senim joq», - dedi kompanııa ókili.

Qazirgi ýaqytta ósip kele jatqan suranysty qanaǵattandyrý úshin danııalyq kompanııa óndiristiń bir bóligin aýtsorsıngke berý múmkindigin zerdeleýde. AQSh-ta óndirýshige tehnologııalardy berý týraly kelisimshart jasasý múmkindigi qarastyrylýda.

Bavarian Nordic ázirlegen preparat Eýropada Imvanex, AQSh-ta Jynneos jáne Kanadada Imvamune markasymen satylady. Ol sheshekke qarsy egýge maquldandy, keıinirek maımyl sheshegine qarsy qoldanýǵa ruqsat etildi.

Maımyl sheshegi vırýsynyń ıtten adamǵa berilý jaǵdaılary áli baıqalǵan joq, alaıda Reseı Federatsııasynyń vırýsologynyń pikirinshe, mundaı múmkindik, ásirese ımmýnıteti tómen naýqastarǵa qatysty bolýy múmkin.

«It adamdarǵa juqtyrýy múmkin be? Joq, mundaı jaǵdaılar áli baıqalǵan joq. Biraq teorııalyq turǵydan mundaı múmkindik saqtalýy yqtımal, ásirese eger adamnyń ımmýnıteti álsiregen bolsa. Mysaly, eger ıesi AITV juqtyrǵan ıt maımyl sheshegin juqtyrsa. Infektsııa saý adamdaǵy sııaqty áreket etpeıtini túsinikti, sondyqtan belgili bir saqtyq sharalaryn saqtaý usynylady», - dedi ol.

Eger úı janýarynyń ıesi onyń maımyl sheshegin juqtyrǵan naýqaspen baılanysta bolǵanyn bilse, jaqyn baılanystardan aýlaq bolǵany jón. Sondaı-aq, janýarmen baılanysta bolǵannan keıin qolyńyzdy jýý kerek.