Maımyl sheshegin juqtyrǵandar sany, tipti kóp bolýy múmkin - DDSU

NUR-SULTAN. QazAqparat – Dúnıejúzilik densaýlyq saqtaý uıymynyń (DDSU) ókili Rozomýnd Lıýıs Jenevadaǵy brıfıngte sóz sóılep, tıisti top ókilderi arasynda tıimdi sharalardy júzege asyrǵan kezde maımyl shesheginiń taralýyn toqtatýǵa bolatyndyǵyn aıtty, dep habarlaıdy QazAqparat BUU Jańalyqtar ortalyǵyna silteme jasap.

Doktor Lıýıs búginde qaýipti emes aımaqtarda jaǵdaıdyń nasharlaýyna jol bermeý úshin aýrýdyń órshýin toqtatý kerek ekenin atap ótti.

«Bıyl 16 myń ınfektsııa anyqtaldy, biraq jaǵdaılardyń naqty sany budan da joǵary bolýy múmkin. Kongo Demokratııalyq Respýblıkasynda myńdaǵan adam maımyl sheshegi aýrýyna kúdikpen júgindi, biraq testileý múmkindigi shekteýli. Rastalmaǵan jaǵdaılar jahandyq statıstıkaǵa kirmeıdi», - dep túsindirdi Rozomýnd Lıýıs.

Sondaı-aq, ol aýrýǵa shaldyqqandar arasynda 81 jasqa deıingi 17 bala bar ekenin aıtty. Kóptegen jaǵdaı jigitter arasynda anyqtaldy. Naýqastardyń ortasha jasy - 37 jas. Maımyl sheshegi aýrýy adammen tyǵyz fızıkalyq baılanys arqyly beriledi. Sondyqtan, aýrý kıim, tósek-oryn, súlgiler men ydys-aıaqtar arqyly taralýy múmkin. Osy jylǵa deıin vırýs negizinen Afrıkada taraldy, onda ol endemıkalyq bolyp sanalatyn.

«Qazirgi tańda birqatar elde erlermen seksýaldyq baılanysqa túsetin er adamdar arasynda keńinen taralyp otyr. Stıgmatızatsııa men dıskrımınatsııa vırýstyń ózi sııaqty qaýipti bolýy múmkin ekenin túsiný qajet», - dedi ol.

Taıaýda DDSU maımyl sheshegin álemdik aýqymdaǵy tótenshe jaǵdaı dep jarııalady.

Foto: Krıstına Mýssını/ news.un.org