Maımyl sheshegi tirkelgen memleketter ishinde AQSh kósh bastap tur

VAShINGTON. QazAqparat – Aýrýlardy baqylaý jáne aldyn alý ortalyǵynyń málimetinshe 25 shildedegi jaǵdaı boıynsha AQSh-ta maımyl sheshegin juqtyrýdyń 3846 oqıǵasy tirkelgen jáne osy kórsetkish boıynsha álemde birinshi oryn alyp otyr, dep habarlaıdy QazAqparat ABC News-ke silteme jasap.

Aýrý juqtyrǵan amerıkalyqtardyń sany Ispanııadaǵy 3100 jaǵdaı men Germanııadaǵy 2352 adamnan artyq.

Álem boıynsha bul aýrý 75 elde 18 100-ge jýyq adamnan anyqtaldy. Sonyń ishinde 17 800-den astam adam buǵan deıin atalǵan aýrý tirkelip kórmegen elderde juqtyrǵan.

Densaýlyq saqtaý salasynyń mamandary maımyl sheshegin juqtyrǵandar sany AQSh-ta resmı tirkelgen jaǵdaılardan áldeqaıda kóp ekenin aıtyp otyr. Sondyqtan úkimet testileý men epıdemıologııalyq qadaǵalaý sharalaryn kúsheıtip jatyr.

Aýrýlardy baqylaý jáne aldyn alý ortalyǵynyń dırektory Roshel Valenskıdiń aıtýynsha, ádette maımyl shesheginiń belgileri vırýs juqtyrǵannan keıin úsh apta ishinde kórinedi. Sondyqtan shilde men tamyzda aýrý juqtyrǵandar sany kóbeıýi múmkin.

Tehastaǵy balalar aýrýhanasy arnaıy oqshaýlaý bólimshesiniń medıtsınalyq dırektory doktor Emı Arrıngton adam lıft batyrmasyn basyp nemese saýda ortalyǵynda bireýdiń qasynan ótken kezde maımyl sheshegin juqtyra almaıtynyn aıtty. Vırýs uzaq ýaqyt tyǵyz qatynasta bolǵan kezde ǵana juǵady – aýrý juqtyrǵan adamnyń terisindegi ınfektsııalyq oshaqqa tıip ketse, aýrý adamnyń kıimi, tósek-ornymen janasqan sátte berilýi yqtımal.

Foto: abcnews.go.com