«Maımyl sheshegi aýrýynan 271 mln adam óledi» - aqparat feık

NUR-SULTAN. QazAqparat – Internet-paıdalanýshylar maımyl sheshegi aýrýynyń taralý stsenarııi jazylǵan qujatpen bólisýde. Onda kelesi jyly ınfektsııa saldarynan álem boıynsha 271 mln adam kóz jumady. Stopfake.kz saıtynyń jazýynsha, bul aqparat jalǵan, dep habarlaıdy QazAqparat.

«Іs júzinde taratylǵan qujat 2021 jyly «ıAdrolyq qaýipti azaıtý bastamasy» (NTI) uıymdary men Mıýnhendegi qaýipsizdik konferentsııasy ótkizgen oqý-jattyǵýlar týraly eseptiń bir beti bolyp tabylady.

Maımyl sheshegi aýrýy týraly jazylǵanyna qaramastan, bul stsenarıı tolyǵymen oıdan shyǵarylǵan. Onda Brınııa men Arnıka sııaqty oıdan shyǵarylǵan elder men oqıǵalar jaıly aıtylǵan. Zardap shekkenderdiń sany men aýrýdyń damý qarqyny da negizsiz jáne stsenarııde sımýlıatsııany anaǵurlym shyndyqqa uqsas etip kórsetý úshin jazylǵan», - delingen saıtta.

Degenmen, atalǵan qujat konspırologııa jaqtaýshylary arasynda keńinen talqylanǵan. Olardyń keıbiriniń pikirinshe, qujat maımyl sheshegi aýrýy aldyn ala josparlanǵanyn dáleldeıdi. Bul teorııany Bloomberg portaly joqqa shyǵardy.

Bıofızıka doktory jáne ıadrolyq qaýipti azaıtý bastamasynyń vıtse-prezıdenti Haıme ıAsıf ótken jylǵy oqý-jattyǵýlar tolyǵymen oıdan shyǵarylǵan stsenarıı boıynsha ótkizilgenin jáne aýrýdyń naqty órshýine «daıyndyq» bolmaǵanyn aıtqan.

«Oıdan shyǵarylǵan stsenarııdi NTI jazdy. Maqsat – COVID-19 sııaqty yqtımal pandemııalardyń aldyn alýǵa jáne olarǵa jaqsy den qoıýǵa múmkindik beretin qajetti sharalardy talqylaý. Jattyǵý maqsattary úshin biz oıdan shyǵarylǵan stsenarıımen baılanysty qozdyrǵyshty tańdadyq. Sondyqtan basqalarynyń arasynan maımyl sheshegi aýrýyn tańdadyq», – dedi ol.

Demek, taratylǵan qujat aýrýdyń naqty órshýiniń stsenarııi emes. Bul oıdan shyǵarylǵan oqıǵalarǵa negizdelgen oqý-jattyǵýlar týraly eseptiń bir beti ǵana.