Maımyl sheshegi qalaı juǵady – dáriger jaýaby

<p>ALMATY. KAZINFORM &ndash; Almaty qalasynyń sanıtarııalyq-epıdemıologııalyq baqylaý departamenti shetelge saıahattaýdy josparlap otyrǵan jerlesterimizge maımyl shesheginen saqtanýdyń nusqaýlyǵyn usyndy.&nbsp;</p>

– Maımyl sheshegi denege zaqymdalǵan teri, shyryshty qabattar (aýyz qýysy, jutqynshaq, kóz, jynys músheleri) nemese tynys alý joldary arqyly enedi. Bul vırýs adamǵa aýrý janýarlardyń tistep nemese tyrnap alýy arqyly, sonymen qatar ań aýlaý, tamaq daıyndaý, terisimen jumys isteý nemese muqııat óńdeýden ótpegen janýarlardyń etin jegen kezde juǵady. Sondaı-aq maımyl sheshegi kıim-keshek nemese tósek-oryn sııaqty lastanǵan zattardan, densaýlyq saqtaý mekemelerinde nemese tatý salondary sııaqty qoǵamdyq oryndarda ótkir quraldardan jaraqat alý kezinde juǵýy múmkin, - dedi Almaty qalasynyń sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova.

Sondaı-aq ol maımyl shesheginiń ınkýbatsııalyq kezeńi 6-dan 13 kúnge deıin sozylatynyn jáne odan keıin qyzba, bas aýrýy, jalpy adam boıyndaǵy álsizdik paıda bolyp, bet, aıaq, alaqandarda, aýyz qýysy men jynys aımaǵynda bórtpe shyǵatynyn atap ótti. Ásel Qalyqovanyń aıtýynsha, maımyl sheshegi ádette ózdiginen qaıtady. Biraq balalarǵa, júkti áıelderge jáne ımmýnıteti tómen adamdarǵa aýyrdan jazylý ońaı bolmaýy múmkin. 

Sanıtarııalyq-epıdemıologııalyq baqylaý departamenti shetelge shyǵýdy josparlaǵan jerlesterimizge maımyl sheshegi juqpas úshin birqatar erejeni ustanýǵa keńes beredi: 

1. Basqa elge barar aldynda osy aımaqtaǵy epıdemıologııalyq jaǵdaı týraly aqparatty tekserińiz. Bul sizge qaýipten habardar bolýǵa jáne qajetti saqtyq sharalaryn qabyldaýǵa kómektesedi.

2. Teri bórtpeleri nemese aýrýdyń basqa belgileri bar adamdarmen jaqyn qarym-qatynasty azaıtýǵa tyrysyńyz.

3. Eger sizde belgiler paıda bolsa, ınfektsııanyń yqtımal taralýyn boldyrmaý úshin basqa adamdarmen baılanysta bolýdan aýlaq bolyńyz.

4. Maskany qoldanyńyz, terińizge jáne bórtpelerge qol tıgizbeńiz. Qolyńyzdy júıeli túrde jýyńyz jáne janasqan zattardy zararsyzdandyryńyz.

5. Eger úıge oralǵannan keıin 21 kún ishinde bórtpe bezgegi, bas aýrýy nemese lımfa túıinderiniń isinýi sııaqty belgiler paıda bolsa, dereý dárigerge qaralyńyz.

6. Medıtsınalyq mekemege barǵan kezde dárigerge tıisti taǵaıyndaýy úshin qaıda bolǵanyńyzdy jáne kimmen baılanysta bolǵanyńyzdy habarlaýdy umytpańyz.

Eske salaıyq, Astana men Almaty áýejaılarynda maımyl sheshegi ınfektsııasyna qarsy oqý-jattyǵý ótken bolatyn.

Sondaı-aq Taılandta maımyl shesheginiń alǵashqy jaǵdaıy anyqtalǵanyn jazǵanbyz.