Maıqaıyńdaǵy «Shanhaı» aýdanynyń máselesin arnaıy komıssııa tekseredi

<p>PAVLODAR. KAZINFORM - Komıssııa aýmaqta turyp jatqan halyqtyń qaýipsizdigin zerdelep, ózge jerge qonys aýdarýdyń qajettiligin anyqtaıtyn bolady. Oǵan barlyq múddeli memlekettik organdar qatysady dep kútilýde.&nbsp;</p>

Bul týraly Pavlodar oblysynyń jumyldyrý daıyndyǵy jáne azamattyq qorǵanys jónindegi basqarma basshysy Qanat Kárimov «Shanhaı» aýdany turǵyndarynyń saýalyna joldaǵan jaýap hatynda málimdedi.

«Qazirgi ýaqytta «Maıqaıyńaltyn» AQ taý-ken teliminiń aýdanyndaǵy opyrylǵan jerde izdestirý-qutqarý jumystary jalǵasýda. Іzdeý jumystaryna 144 adam jáne 42 tehnıka jumyldyryldy. Atalǵan jumystar aıaqtalǵannan keıin barlyq múddeli memlekettik organ kiretin arnaıy komıssııa qurylady. Komıssııa jumysynyń qorytyndysy boıynsha halyq qaýipsizdiginiń sanıtarlyq aımaǵynyń máseleleri jáne olardyń odan ári qonys aýdarý qajettiligi, sondaı-aq basqa da áleýmettik máseleler zerdelenetin bolady», - delingen jaýapta.

Foto: Kazinform

 

Buǵan deıin Maıqaıyń kentindegi «Shanhaı» aýdanynyń turǵyndary úılerimen qosa jer astyna túsip ketýden qorqyp otyrǵany týraly habarlaǵan edik. Jergilikti turǵyndardyń baspanalary avtobýs qulaǵan oıyqtan nebári 300-400 metr jerde ornalasqan. 

Kazinform tilshisi kótergen «Shanhaı» jurtynyń máselesi Májiliske jetti. «Amanat» fraktsııasynyń bir top depýtaty atynan Premer-mınıstrdiń birinshi orynbasary Roman Sklıarǵa depýtattyq saýal joldap, halyq qalaýlylary shahta mańynda ornalasqan, apattyq jaǵdaıda turǵan úılerdiń jaǵdaıyn Úkimet organdarynan nazarǵa alýdy suraǵan edi.