Maıqaıyńdaǵy qaıǵyly oqıǵa: jarty jyldan keıin denesi tabylǵan qutqarýshy jerlendi

<p>PAVLODAR. KAZINFORM &ndash; Maıqaıyńdaǵy opyrylyp túsken kenish túbinde alty jarym aı ýaqyt jatqan eki qutqarýshynyń biriniń denesi tabyldy. Týystary onyń Aıdos Shaımerdenniń múrdesi ekenin naqtylady. Búgin, 19 shildede qaıǵyly oqıǵadan alty aı ótken soń denesi tabylǵan qutqarýshy Aıdos Shaımerden Pavlodar oblysynda jerlendi.</p>

Bul týraly oblys ákimi Asaın Baıhanov áleýmettik jelidegi paraqshasynda jazdy. Ákim qutqarýshynyń jaqyndaryna kóńil aıtty.

«Búgin, 19 shilde kúni «Maıqaıyń-altyn» AQ taý-ken aýdanynda opyrylǵan jerdegi izdestirý jumystary barysynda denesi tabylǵan qutqarýshy Aıdos Shaımerdenniń janazasyna qatystym. Marqumnyń týǵan-týystary men jaqyndaryna kóńil aıtamyn. Marqumǵa ıman baılyǵyn bersin», - dedi ákim.

Oblys ákimi avtobýs júrgizýshisiniń denesin tabý úshin izdestirý jumystary jalǵasyp jatqanyn jetkizdi. 

Foto: instagram.com/ asaiyn.baikhan

«Denesi áli tabylmaǵan avtobýs júrgizýshisi Aıyp Tileýbergenovtiń otbasymen kezdestim. Jaqyn arada biz ony taýyp, týystaryna bere alamyz degen úmittemin. Odan keıin izdestirý jumystary júrgizilip jatqan jerde boldym. Onda topyraqtyń syrǵyp, qulaý qaýpi bolǵandyqtan, jumystar turaqty negizde azdaǵan úzilistermen júrgizildi. 17 maýsymda skanerleý arqyly avtobýstyń naqty ornalasqan jerin anyqtaý úshin «Altynalmas» AQ mamandary tartyldy. Zertteý nátıjeleri boıynsha paıda bolǵan shuńqyrdyń eń túbinen 12 metr tereńdikte avtobýstyń boljamdy ornalasqan jeri anyqtaldy. Qazir shuńqyrdyń túbinde topyraqty qaıta ekskavatsııalaýdy jalǵastyryp jatyr. Jumystar asa saqtyqpen jáne barlyq qaýipsizdik normalaryn saqtaı otyryp júrgizilip jatyr», - dedi ol. 

Foto: instagram.com/asaiyn.baikhan

Eske sala keteıik, Pavlodar oblysyndaǵy maıqaıyń altyn kenishinde ishinde adamdar bar avtobýs bıylǵy 4 qańtar kúni jer astyna túsip ketti.

Keıin oqıǵa ornynan eki adamnyń denesi tabyldy.

Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatqan bolatyn.

Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandanǵany týraly habarlaǵanbyz.

Marqum Aıdostyń jary Nursulý Shaımerden buǵan deıin kúıeýiniń tiri ekenine eshqandaı úmiti joq ekenin, qutqarýshylar múrdesin qazyp berse, arýlap jer qoınyna tapsyrý sońǵy tilegi ekenin aıtqan edi.

«Bizdiń otbasymyz bul kúndi uzaq ýaqyttan beri taǵatsyzdana kútken edik. Qutqarýshylar jaqyn adamdarymyzdy taýyp alatynyna senimdimiz. Kásiporyn basshylyǵy aıtqandaı, eń áýeli oıyq mańynda ken jynystaryn qazý jumystary júrgiziledi. Sodan soń kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynyń qutqarýshylary iske kirisedi. Qazirgi ýaqytta jumystar táýlik boıy júrgizilip jatyr. Bas dırektor Qaırolla Júrsinbaev jer astynda jatqan qos azamatty taýyp alǵan soń ǵana shahta iske qosylatynyn jetkizdi», - degen edi buǵan deıin Nursulý Shaımerden Kazinform agenttininiń tilshisine bergen suhbatynda.