Maıqaıyńdaǵy apatta qaza tapqan qutqarýshynyń qyzy ótemaqynyń durys tólenbegenine narazy

<p>PAVLODAR. KAZINFORM - Oleg Tyshkevıch kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby (KÁAQQ ROSh) Pavlodar fılıalynda 27 jyl eńbek etken. &nbsp;Qutqarýshylar avtobýs qulaǵan oıyqtaǵy topyraq arasynan 4 qańtar kúni <a href="https://kaz.inform.kz/news/maykayinaltin-kenshndeg-okiga-koz-zhumgan-ek-kutkarushinin-ati-zhon-belgl-boldi-e4c471/" target="_blank" rel="noopener">2 azamattyń múrdesin</a> alyp shyqqan edi.&nbsp;</p>

Buǵan deıin Pavlodar oblysynyń ákimi Asaıyn Baıhanov qaza tapqan qutqarýshylardyń otbasyna «Maıqaıyńaltyn» AQ jáne KÁAQQ ROSh-nan 4,5 mln teńgeden astam mólsherde materıaldyq kómek kórsetiletinin málim etken bolatyn. 

Alaıda marqum Oleg Tyshkevıchtiń qyzy ıAna Osolodkova ýáde etilgen qarajattyń durys bólinbeı otyrǵanyna shaǵymdandy. 

«Men ákemniń kenetten kóz jumǵany jaıynda kórshilerimnen estidim, kásiporyn bul jaıynda habarlamady. Ákemdi jer qoınyna tapsyrǵan soń bizdi barlyǵy umytty. Eshkim baılanyspaıdy, bergen telefon nómirleri jaýap bermeıdi. Ýáde etilgen 4,5 mln teńge berilgen joq. Tek «Maıqaıyńaltyn» kenishinen 2 mln teńge kómek bólindi. Maǵan tegin qyzmet kórsetetin psıhologtyń kómegi qajet edi, ol da usynylmady. Qazir qyzmet quny 20 myń teńge turatyn psıhoterapevtiń qyzmetin paıdalanyp otyrmyn. Ákemniń óliminen soń júıke júıem buzylyp, depressııaǵa ushyradym. Budan 1,5 jyl buryn ákem ekeýimiz anamdy joǵaltyp, qatty qınalǵan edik. Qazir qatty qamyǵý ústindemin, ne isteý kerek ekenin bilmeımin. Ákemdi jerleý rásimine 1 mln teńgedeı aqsha ketti. Men májbúrli túrde Almaty qalasyndaǵy aqyly klınıkaǵa baryp, 500 myń teńgege emdeldim. Belgili sebepterge baılanysty qańtar aıynda jumys istemedim. Joǵary turǵan organdardan eshbir qarjylaı jáne moraldyq kómek kóre almaı otyrmyz. Ákemniń ólimine kásiporyn basshylyǵynyń nemquraılyǵy sebep boldy. Oblystyq tótenshe jaǵdaılar departamenti men «Maıqaıyńaltyn» basshylyǵy bizben habarlasýyn ótinemiz. Aǵamyz ekeýimiz qıyn jaǵdaıda qaldyq», - dep shaǵymdandy marqum qutqarýshynyń qyzy. 

ıA. Osolodkovanyń shaǵymyna oraı Pavlodar oblysy ákiminiń baspasóz qyzmeti kelesideı jaýap berdi:

«Qaza tapqan qutqarýshylardyń otbasylaryna 4,5 mln teńge kóleminde materıaldyq kómek kórsetildi, onyń ishinde «Maıqaıyńaltyn» AQ 2 mln teńge tóledi, Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby 500 AEK nemese 1 mln 846 myń teńge mólsherinde materıaldyq kómek kórsetti.  Sondaı-aq jerleý rásimderine 100 AEK nemese 369 200 teńge mólsherinde tólem jasaldy. Biryńǵaı jınaqtaýshy zeınetaqy qorynan jerleýge 94 AEK nemese 347 000 teńge mólsherinde tólem jasaldy. 

Bul tólemderdi múrdeleri tabylǵan 2 qutqarýshynyń otbasylary aldy. Osyndaı tólemder joǵalǵan qutqarýshylardy izdestirý jumystary aıaqtalǵannan keıin, olardyń múrdesi tabylǵan jaǵdaıda nemese qaıtys boldy dep tanylsa, qalǵan otbasylarǵa da taǵaıyndalady. Sonymen qatar otbasylarǵa asyraýshysynan aıyrylý boıynsha memlekettik áleýmettik járdemaqy taǵaıyndalady (18 jasqa tolǵanǵa deıin otbasyndaǵy árbir kámeletke tolmaǵan adamǵa aı saıynǵy tólem). 

Otbasylarǵa beriletin kómek tek osy tólemdermen ǵana shektelip qalmaıdy. Jergilikti atqarýshy organ Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtabynan qosymsha saqtandyrý tólemderi jáne «Maıqaıyńaltyn» AQ-nan iri materıaldyq kómek kórsetý týraly máseleni pysyqtaýda. Bul tólemder tólengen somadan birneshe esege kóp. Tólemderdiń naqty somalary izdestirý jumystary aıaqtalǵannan keıin habarlanatyn bolady», - dep jaýap berdi ákimdikten.