Maıqaıyńdaǵy apat: Tiri deıin desem, úıde joq, óli deıin desem, beıit joq
Apattyń bolǵanyna úsh aıǵa jýyqtasa da, qutqarýshy men avtobýs júrgizýshisiniń máıiti áli tabylǵan joq. Al izdeý jumystary toqtap tur. Marqumnyń jaqyndary qutqarý jumystaryn jalǵastyrýdy talap etip otyr. Pavlodar oblysynyń ákimdigi men jergilikti prokýratýradan kúder úzgen olardyń endigi úmiti Prezıdentte.
Qutqarýshy Aıdos Sháımerdenniń áıeli Astanaǵa shıitteı bala-shaǵasyn ertip kelgen.
«Asyraýshymnan aıyryldym, bes balamdy endi kim asyraıdy. Jubaıymnyń máıitin taýyp berse, ǵurypqa saı jerlesek» — dep kóz jasyna erik berdi.
Pavlodarda izdeý jumystaryn jalǵastyrýdy surap, ákimdik pen prokýratýranyń tabaldyryǵyn tozdyrǵan Nursulý esh shara qalmaǵan soń, úkimetten, Bas prokýratýradan kómek surap otyr.
«Bizdi estıtin pende joq. Kishkentaı balalarymdy alyp Astananyń tórine kelip otyrmyn, alyp berse eken, shyǵaryp berse eken deımin. Tiri emes ekenine kóndik qoı, tiri deıin desem, úıde joq, óli deıin desem, beıit basy joq», — deıdi Nursulý Sháımerden.
Topyraq astynda qalǵan eki adam áli kúnge deıin apattan qutqarý qyzmetiniń jumysshylary retinde eseptelip, olarǵa aı saıyn jalaqy tólenip otyr eken. Máıit tabylmaǵandyqtan, qaıtys bolǵany týraly kýálik te joq. Sol sebepti eki otbasyǵa ótemaqy tólenbegen, asyraýshysynan aıyrylǵanyn otbasy retinde járdemaqy da ala almaıdy.
Avtobýs júrgizýshisi Aıyp Tileýbergenovtiń jaqyndary istiń sozylyp ketkenine narazy.
«Tórt kisiniń ólimine kombınat jaýap bergisi kelmeı, aǵamyzdyń jumys orny, qutqarýshylarmen sottasaıyn dep jatyr, solardy kináli qylǵysy kelip jatyr. Jer solardiki, oıylyp ketken jer solardyń qatelikterinen, salǵyrttyǵynan boldy, ony moıyndaǵysy kelip turǵan joq. «Bizdiń kinámiz joq» dep otyr», — deıdi avtobýs júrgizýshisiniń týysy Amangeldi Tileýbergenov.
Іzdeý jumystary qashan jandanatynyn tótenshe jaǵdaılar mınıstrligi de aıta almady. Qazba jumysynyń toqtaǵanyna bir aı ótse de, saraptama jasalmaǵan.
«Eki jaq saraptama júrgizip, qutqarýshylar úshin qazba jumystary qanshalyqty qaýipsiz ekenine sheshim qabyldaýy tıis. Sarapshylar qaýip joq dep sheshse, árıne, izdeý jumystary qaıta jandanady», — deıdi TJM vıtse-mınıstri Baýyrjan Syzdyqov.
Indýstrııa mınıstri ken ornynda óndiristik qaýipsizdikke qarjy az bólinetinin moıyndady.
«Bul jaǵdaıdy Pavlodar ákimimen talqyladyq, ınvestorǵa qatysty naqty sheshimder qabyldaımyz. Buǵan deıin istegenimizdeı, aktsıonermen tikeleı dıalog qurmaqpyz. Ol kenishtegi óndiristik qaýipsizdik pen ken ornyn ıgerýdi óz moınyna alady nemese naqty osy ınvestordyń jer qoınaýyn paıdalaný quqyǵy máselesin qaıta qaraıtyn bolamyz. Bir sheshimge kelemiz», — dedi ındýstrııa jáne ınfraqurylymdyq damý mınıstri Qanat Sharlapaev.
Avtobýspen birge topyraq astynda qalǵan eki adam áli joǵalǵandar sanatynda. Al olardyń otbasy zardap shegýshi retinde tanylmaǵan. Pavlodardan kómek surap kelgen qaýymdy úkimettegiler Bas prokýratýraǵa, ondaǵylar aınalyp kelip oblys prokýroryna qaıta baǵyttapty.