Maıqaıyńda opat bolǵan qutqarýshynyń otbasy jumys berýshiden 120 mln teńge óndirip aldy

<p>PAVLODAR. KAZINFORM — Pavlodar oblysy Maıqaıyńaltyn ken ornynda alyp shuńqyrǵa qulaǵan avtobýs oqıǵasy boıynsha sot úkimi shyqty. </p>

Bıyl 4 qańtarda «Maıqaıyńaltyn» AQ aýmaǵyndaǵy boljamdy órt ornyna tehnologııalyq jolmen kele jatqanda úsh qutqarýshy men júrgizýshisi bar avtobýs shuńqyrǵa qulap ketken.

Qaza tapqandar — «Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby» JShS qyzmetkerleri.

Osy fakti boıynsha quramynda Tótenshe jaǵdaılar mınıstrligi, Pavlodar oblysynyń ákimdigi, memlekettik eńbek ınspektory, «Maıqaıyńaltyn» AQ, «Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby» JShS-nen quralǵan komıssııa jazataıym oqıǵaǵa tekserý júrgizip, onyń qorytyndysy boıynsha jumys berýshiniń kinási — 100%, jumyskerlerdiń kinási múlde joq ekeni anyqtaldy.

Qaıtys bolǵan qutqarýshy T-nyń anasy, qyzy, uly jáne ápkesi marqumnyń qyzmettik mindetterin atqarý kezinde qaıtys bolýyna baılanysty moraldyq zalal óteýdi talap etip sotqa júgindi.

Moraldyq zııan olardyń ulynan, ákesinen, aǵasynan aıyrylýynyń aýyrlyǵynan, jerleý kezinde onymen qoshtasýǵa múmkindik bolmaýynan, jumys berýshiniń kóńil aıtyp, qoldaý kórsetpeýinen bolyp otyr.

Sot bolǵan jazataıym oqıǵaǵa jumys berýshiniń 100% kinásin negizge ala otyryp, qaıtys bolǵan qutqarýshynyń týystarynyń talaptaryn tolyq kólemde qanaǵattandyryp, árbir týysynyń paıdasyna qoıylǵan talap kóleminde 30 000 000 teńgeden, jalpy somasy 120 mln teńge moraldyq zııan óndirdi.

Sheshim zańdy kúshine engen joq.

Eske sala keteıik, 4 qańtarda Pavlodar oblysyndaǵy Maıqaıyń altyn kenishinde ishinde adamdar bar avtobýs jer astyna túsip ketti.

Apat bolǵan kúni oqıǵa ornynan eki qutqarýshynyń múrdesi tabyldy.

Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty.

Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy.

19 shildede Maıqaıyńda alty aıdan soń úshinshi qutqarýshynyń múrdesi tabylǵan edi. Marqum Aıdos Shaımerdenniń denesi 70 metr tereńdikten qazyp alynǵan.

25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.

Astana soty altyn kenishindegi qaıǵyly oqıǵa 100% «Maıqaıyń-altyn» AQ-nyń kinásinen bolǵan degen sheshim shyǵardy.