Maıqaıyńda qaza bolǵan qutqarýshylardyń otbasylaryna saqtandyrý ótemaqysy tólenip, banktegi qaryzdary keshiriledi
Pavlodar oblysynyń ákimi Asaıyn Baıhanov búgin «Maıqaıyńaltyn» AQ taý-ken aýmaǵyndaǵy opyrylǵan jerde qaza bolǵan qutqarýshylardyń otbasylaryna barǵan.
«Berdibek Sarqyttyń týǵan-týystarymen Maıqaıyńdaǵy úıinde kezdestim, buǵan deıin men munda onyń jerleý rásiminde bolǵanmyn. Meniń búgingi kelýimniń maqsaty - qaza tapqan qutqarýshylardyń týystaryna olardy eshkim jalǵyz qaldyrmaıtynyn jetkizý. Árıne, eshqandaı qoldaý sózderi men tólemder jaqyndaryńyzdy qaıtarmaıdy. Biraq, biz aýmaǵynda qaıǵyly jaǵdaı oryn alǵan «Maıqaıyń-altyn» AQ-nan, memleketten jáne jumys berýshiden jan-jaqty kómek alý úshin qajettiniń bárin jasaýdamyz» dep jazdy ákim.
Buǵan qosa ol marqum qutqarýshy Oleg Tyshkevıchtiń Ekibastuzda turatyn qyzymen de sóıleskenin jetkizdi. Óńir basshylyǵy jumys berýshi men «Maıqaıyńaltyn» AQ-nyń ıAna men onyń aǵasy aldyndaǵy barlyq mindettemeleriniń oryndalýyn qadaǵalaıtyn bolady. Qaza bolǵan jandardyń otbasylaryna kámeletke tolmaǵan balalardyń bolýy men olardyń jasyna baılanysty kásibı áskerılendirilgen avarııalyq-qutqarý qyzmetteriniń respýblıkalyq ortalyq shtabynan 5-10 jyl úshin ortasha aılyq jalaqy mólsherinde saqtandyrý ótemaqysy beriledi.
«Maıqaıyńaltyn» AQ buǵan deıin bólgen qarajatyn birneshe esege arttyrady, al, jumys berýshi qaza tapqandardyń otbasylarynyń nesıeleri men kommýnaldyq qaryzdaryn óteýdi óz moınyna alady.
«Osyndaı kómekter izdestirý júrgizilip jatqan eki qutqarýshynyń deneleri tabylǵan nemese olardy qaıtys boldy dep tanyǵan jaǵdaıda olardyń otbasylaryna da kórsetiledi. Qarjylaı kómektiń kólemi týraly aqparat jurtshylyqqa barlyq qajetti rásimder aıaqtalǵannan keıin habarlanatyn bolady» dep habarlady A.Baıhanov.
Eske sala keteıik, Maıqaıyńdaǵy apatta qaza tapqan qutqarýshynyń qyzy ótemaqynyń durys tólenbegenine narazy ekeni týraly habarlanbyz.