«Maıqaıyńaltyn» qandaı jaǵdaıda jumysyn jalǵastyrady

<p>ASTANA. KAZINFORM &ndash; QR TJM ónerkásiptik qaýipsizdik komıteti tóraǵasynyń orynbasary Musa Tanabaev &laquo;Maıqaıyńaltyn&raquo; AQ kásipornynyń baıytý fabrıkasy qandaı jaǵdaıda jumysyn qaıta jandandyratynyn aıtty.</p>

19 aqpanda «Maıqaıyńaltynǵa» qarasty ken baıytý fabrıkasy 1 sáýirge deıin jumysyn toqtatqan edi.

«Apat kezinde zaýytta bir jarym aıǵa shıkizat qory boldy. Munyń bári qoldanyldy. Qazir shıkizattyń bolmaýyna baılanysty zaýyt toqtap tur», - dep túsindirdi Musan Tanabaev Úkimet kýlýarynda.

Onyń aıtýynsha, kásiporyn tergeý faktisinde kórsetilgen belgili bir sharalardy júrgizýi kerek.

«Birinshisi – opyrý saldarynyń syn-qaterlerin baǵalaýǵa ǵylymı saraptama júrgizý. Bos qalǵan keńistikte alda ne bolary belgisiz. Ekinshisi – mańdaıshalardyń sanyn anyqtaý jáne olardy ornatý. Olar jumysshylardy soqqy tolqynynan qorǵaý úshin qajet», - dedi M.Tanabaev.

Spıker bul sharalardy oryndaý ónerkásiptik qaýipsizdik jaǵdaılaryn qamtamasyz etý úshin qajet ekenin aıtty. Eger «Maıqaıyńaltyn» AQ bul is-sharalardy 30 naýryzǵa deıin oryndasa, onda kásiporyn jumysyn qaıta bastaýy múmkin.

Eske sala ketsek, 4 qańtar kúni «Maıqaıyńaltyn» ken ornynda úlken oıyq mańyndaǵy topyraq opyrylyp, 4 adam mingen avtobýs jer astyna túsip ketken bolatyn. Eki adam qaıtys bolyp, eki adam áli tabylmady.