«Maıqaıyńaltyn» AQ-nyń altyn kenishinde jumyskerdi tehnıka janshyp ketti

<p>PAVLODAR. KAZINFORM &mdash; &laquo;Maıqaıyńaltyn&raquo; kásipornynda motor jóndeýshi bolyp eńbek etken 1992 jylǵy er azamat abaısyzda qaza tapty. Ol tehnıkany jóndeý kezinde ken tıegish mashına janshyp ketken.</p>

Qaıǵyly oqıǵa búgin tústen keıin bolǵan.

— Altyn shahtasynda kóp jyldardan beri motor jóndeýshi bolyp eńbek etken er azamat kólik quralyn jóndeý kezinde kóz jumdy. Kýágerlerdiń sózinshe, ol kenishke túsip, isten shyǵyp turǵan tehnıkany qarap jatqanda ekinshi ken tıegish kólik abaısyzda janshyp ketken. Saldarynan 1992 jylǵy er azamat janshylyp qalǵan. Marqumnyń otbasy bar, sońynda áıeli men 2018 jylǵy týǵan balasy qaldy, - dep habarlady Baıanaýyl aýdany Maıqaıyń kentiniń ákimi Erbatyr Moldataev.

Pavlodar oblystyq polıtsııa departamentiniń baspasóz qyzmeti abaısyzda adam ólimine ákep soqtyrǵan qaýipsizdik tehnıkasy erejelerin buzý deregi boıynsha qylmystyq is qozǵalǵanyn habarlady.

— Tehnıkanyń júrgizýshisi anyqtalyp, polıtsııa bólimine jetkizildi. Oqıǵanyń mán-jaıy men sebepteri tergeý barysynda anyqtalatyn bolady», - dep málimdedi polıtsııadan.

Al Memlekettik eńbek ınspektsııasy komıtetiniń Pavlodar oblysy boıynsha departamenti basshysynyń mindetin atqarýshy Abylaı Sabyrov jazataıym oqıǵaǵa qatysty tergeý-tekserý sharalary uıymdastyrylatynyn habarlady.

— Qazir oqıǵany tergeý komıssııasy qurylyp jatyr. Bizdiń basqarmanyń ókilderi oǵan jetekshilik etedi nemese komıssııa quramyna enedi. Ázirshe oqıǵanyń mán-jaıy týraly aıta almaımyz, - dedi basqarma basshysynyń mindetin atqarýshy.

Eske sala keteıik, bıyl 4 qańtarda Maıqaıyń altyn kenishinde ishinde adamdar bar avtobýs jer astyna túsip ketti. 

Oıyq astynda qalǵan qutqarýshylardyń denesi uzaq izdelip, eń sońǵysy shilde topyraq arasynan qazylyp alyndy.

Al kenishtiń ózi 9 aı ótkende qaıtadan iske qosyldy.