«Maıqaıyń-altyn» kásiporny bankrot bolatyny ras pa
Buǵan deıin Qonaev atyndaǵy taý-ken isi ınstıtýtynyń mamandary «Maıqaıyń-altyn» AQ-nyń kenish shahtalaryna túsip, olardyń kenshiler úshin qanshalyqty qaýipsiz ekenin tekserip jatqany týraly habarlaǵan edik.
Mamandar oń sheshim shyǵarsa, sáýir aıynda kenish qaıtadan jumysyn jalǵastyrýy kerek edi. Alaıda ınstıtýt ǵalymdary ázirshe kenishtiń jaǵdaıyn baǵalaý boıynsha qorytyndylaryn taǵy bir sozatynǵa uqsaıdy.
Bul eki arada altyn kásipornynda eńbek etetin myńǵa jýyq qyzmetkerlerdiń arasynda «shahta tolyǵymen toqtaıdy eken», «Maıqaıyń-altyn» bankrot bolady eken» degen alyp-qashpa áńgime jeldeı esip tur.
Maıqaıyńdyq turǵyndardyń bul aıtyp júrgenderiniń shyndyqqa qanshalyqty janasatynyna kóz jetkizbek oımen kásiporynnyń bas dırektory Qýanysh Botınnen qalyptasqan ahýaldy surap bildik.
«Maıqaıyń-altyn» AQ-nyń basshysy retinde bul aqparattyń shyndyqqa janaspaıtyn qaýeset ekenine sendire alamyn. Bizdiń aktsıonerlerimiz shahta jumysynyń jalǵasýyna, adamdarymyzdyń óz jumys oryndaryna oralyp, kombınattyń tolyqqandy tsıklge kóshýine múddeli. Bul máselede olardyń tarapynan durys ári ádiletti kózqaras bar. Kásiporyn toqtamaıdy, ony ári qaraı damytý úshin aktsıonerlerimiz qosymsha qarjy quıýǵa beıil tanytyp otyr. Qazirgi ýaqytta «Maıqaıyń-altyn» AQ-nyń kenishindegi apatty tergep-tekserý sharalary áli de jalǵasyp jatyr. Bul is-sharalar shamamen 31 naýryzda aıaqtalyp qalady degen úmit bolǵan edi. Biraq quzyrly jáne quqyq qorǵaý organdary áli de biraz ýaqyt jumys isteıtinge uqsaıdy. Qonaev atyndaǵy taý-ken isi ınstıtýtynyń mamandary shahtalarymyzǵa túsip, olardyń qyzmetkerlerimiz úshin qanshalyqty qaýipsiz ekenin baǵalaý ústinde. Negizi bul zertteýdiń túıini de 31 naýryzda qoıylyp, oń sheshim shyqsa shahtadaǵy óndiris jumystary iske qosylady dep úmittengenbiz. Biraq ınstıtýt ókilderi bizge asyqpaýdy eskertti. Barlyǵyn jiti zerttep shyqpaqshy. Árıne, biz úshin qyzmetkerlerimizdiń qaýipsizdiginen mańyzdy másele joq. Sondyqtan zertteýdi derine jetkizýge kelistik. Mamandar barlyq jaıtty nazarǵa alyp, qaýipsizdikti qamtamasyz etetin esepteýlerin júrgizýde», - dep jaýap berdi óndiris ornynyń basshysy.
Belgili bolǵandaı, qazir ken baıytý kombınaty men ózge qurylymdyq bólimshelerde jalpy sany 580 adam jumys istep jatyr. Al jumysy shahtamen baılanysty 260 qyzmetker májbúrli eńbek demalysynda. Olarǵa aılyq eńbekaqysynyń 50 paıyzy mólsherinde jalaqy tólenip otyr.
Eske sala keteıik, buǵan deıin «Maıqaıyńaltyn» jer astyna túsip ketken avtobýsty izdeý jumystaryn ne sebepti toqtatqanyn túsindirdi.
Maıqaıyńda qos qutqarýshyny izdeý jumysynyń sońy suıylyp barady.