Maık Pens AQSh prezıdenttigine úmitker bolatynyn jarııalady

VAShINGTON. QazAqparat – AQSh-tyń burynǵy vıtse-prezıdenti Maık Pens sársenbide AQSh prezıdenttigine úmitker ekenin jáne óziniń burynǵy bastyǵy Donald Trampqa qarsy turatynyn málimdedi, dep habarlaıdy QazAqparat ABS News-ke silteme jasap.

Respýblıkalyq partııanyń saıasatkeri prezıdenttik saılaý naýqanyna qatysý týraly málimdemeni Aıova shtatyndaǵy De-Moın qalasynda bolǵan kezde jasady. Ol óziniń saılaýaldy baǵdarlamasyn usynýmen qatar, basqa kandıdattardy, sonyń ishinde burynǵy prezıdent D.Trampty synǵa aldy.

M.Pens óz sózinde Amerıka halqymen birge ultty jáne shekarany qorǵaıtynyn, Amerıka ekonomıkasyn jandandyryp, bıýdjetti teńestiretinin, túsik jasatýǵa shekteýlerdi, dinı bostandyq prıntsıpterin jáne federaldy úkimettiń qysqarýyn qoldaıtynyn atap ótti.

Sonymen birge, saıasatker D.Tramp «eshqashan» qaıta AQSh prezıdenti bola almaıdy dep boljady. Atap aıtqanda, ol eks-prezıdent esimin naqty atamaı, Konstıtýtsııany elemeıtin nemese ózin odan joǵary qoıatyn «kez kelgen adam» eshqashan prezıdent bolmaýy kerek dedi.

Sarapshylardyń pikirinshe, Maık Pens – naǵyz konservator jáne tamasha memlekettik qyzmetker. Biraq D.Tramppen básekege túsip jatqany úshin ony respýblıkashylar arasynda eshkim aıtarlyqtaı qoldaý kórsetip jatqan joq. Jekelegen baǵalaý boıynsha, ony respýblıkashylardyń tek 18% -y ǵana qoldaıdy.

Qazir M.Pens pen D.Tramptyń Respýblıkalyq partııadan negizgi qarsylastary: AQSh-tyń Nıý-Djersı shtatynyń burynǵy gýbernatory Krıs Krıstı, Florıda gýbernatory Ron Desantıs, AQSh-tyń BUU-daǵy burynǵy Elshisi Nıkkı Heılı, Arkanzas shtatynyń burynǵy gýbernatory Asa Hatchınson, Úndistannan shyqqan kásipker Vıvek Ramasvamı jáne senator Tım Skott.