Maıdangerdiń súıegi 80 jyldan keıin Qazaqstanǵa jetkizildi

ASTANA. QazAqparat – Ekinshi dúnıejúzilik soǵysqa qatysqan Erǵash Pretovtyń súıegi 80 jyldan soń Qazaqstanǵa jetkizildi, dep habarlaıdy QazAqparat QR Qorǵanys mınıstrligine silteme jasap.

1943 jyly qańtar aıynda qaza tapqan qazaq jaýyngeri Novgorod oblysyndaǵy Manýılov aýylynyń mańynda jerlengen bolatyn.

Bıyl maıdangerdiń súıegi týǵan jeri – Túrkistan oblysy Saıram aýdany Qaramurt aýylynda jer qoınyna qaıta tapsyryldy.

«QR Qarýly kúshteri men Qorǵanys mınıstrliginiń qoldaýymen babalar rýhyna taǵzym retinde sonaý Reseı Federatsııasynda batyrlar zıratynda qalǵan 1941-1945 jylǵy Uly Otan soǵysyndaǵy qyzyl ásker, 1942 jyly soǵys maıdanyna baryp, 1943 jyly jaraqat alyp, qaıtys bolǵan ardagerimiz Erǵash Pretov atamyzdyń súıegi Saıram aýdanyna jetkizildi. Bul shara jas jetkinshekterge úlken úlgi bolary haq, taǵylymy mol dep esepteımiz. Osyndaı babalarymyzdyń erligin jastarǵa úlgi etip, tárbıeleımiz dep senemin», - dedi Túrkistan oblysy Qorǵanys isteri departamenti bastyǵynyń orynbasary Jandos Kúlderbaev.

Jerlesterin sońǵy saparǵa áskerı orkestr men qurmetti qaraýyl, týystary men jaqyndary shyǵaryp saldy.