Maıdanda qaza tapqan saryaǵashtyq jaýynger jaıly týystary 75 jyldan keıin bildi

SARYAǴASh. QazAqparat – Ekinshi dúnıejúzilik soǵysta qaza tapqan saryaǵashtyq maıdanger Begmat Súleımenov týraly týystary 75 jyldan keıin bilgen. Reseılik «Halyq esteligi» jobasy aıasynda 15 mln jýyq qujat jarııa bolyp, onda maıdanda mert bolǵan sarbazdar týraly málimetter jaryq kórgen, dep habarlaıdy QazAqparat tilshisi.

Saryaǵash aýdanynyń turǵyny Anar Orazymbetqyzynyń aıtýynsha, soǵysqa onyń ákesi baýyrymen birge attanǵan. Aǵaıyndy Orazymbet Sýleımenov pen Begmat Sýleımenov eki jaqqa bólinip, maıdan shebinde bir-biriniń jaǵdaıyn bilmegen. Soǵys aıaqtalǵanda aǵasy oralyp, inisi habar-osharsyz ketken. Onyń artynan tipti qaraly qaǵaz da kelmepti.

«Ákemniń baýyry, óz erkimen soǵysqa attanǵan Begmat Súleımenov aǵamyz týraly 75 jyl ótkende osy jańadan shyqqan portal arqyly bildik. Qaı jerde soǵysyp, qaı jerde qaıtys bolǵanyn jáne jerlengeni jaıly aqparat aldyq. Osy ýaqytqa deıin ol kisi týraly eshqandaı málimet taba almaǵan edik. Óz ákem, soǵys ardageri Orazymbet Súleımenov birneshe medal jáne alǵys hattarmen marapattalǵan. 90 jasynda ul-qyzdary jáne nemereleriniń ortasynda dúnıe saldy»,- deıdi maıdangerdiń qyzy Anar Álıeva.

Aıta keteıik, ekinshi dúnıejúzilik soǵysta mert bolǵan kóptegen bozdaqtarǵa qatysty aqparat sońǵy jyldary ǵana jaryqqa shyǵa bastady. Qazaqstandyqtar jaqyndarynyń qaı jerde jerlengenin 75 jyl ótkennen keıin ǵana taýyp jatyr.

Uzaq jyldar shań basyp jatqan qujattardy qaıta kóterip, tsıfrlyq júıege júktegen reseılikterdiń eńbegin erekshe aıta ketýge bolady.