Maýsymda teńge baǵamy AQSh dollarymen salystyrǵanda 1%-ǵa álsiredi – Ulttyq bank
Ulttyq bank málimetterine qaraǵanda, Qazaqstan qor bırjasyndaǵy saýda-sattyqtyń ortasha kúndik kólemi bir aıda 144 mln AQSh dollarynan 122 mln AQSh dollaryna deıin tómendedi. Saýda-sattyqtyń jalpy kólemi 2,6 mlrd AQSh dollaryn qurady.
Kvazımemlekettik sektor sýbektileriniń valıýtalyq túsimdi satýy ótken aı ishinde shamamen 288 mln AQSh dollaryn qurady. Kvazımemlekettik sektor kompanııalary ekinshi deńgeıli bankter arqyly valıýta naryǵynda óz betinshe satýdy jalǵastyrýda. 2023 jylǵy 1 shildeden bastap kvazımemlekettik sektor sýbektileri úshin valıýtalyq túsimdi satýdyń mindetti úlesi 50%-dan 30%-ǵa deıin tómendeıdi.
Maýsym aıynda Ulttyq qordan respýblıkalyq bıýdjetke transfertterdi qamtamasyz etý úshin valıýta satý 550 mln AQSh dollaryn qurady. Ulttyq qordan satý úlesi jalpy saýda-sattyq kóleminiń 21%-yn jáne kúnine 29 mln AQSh dollarynan aspaıtyn mólsherdi kórsetti. Ulttyq bank Ulttyq qordyń qarajatymen operatsııalar júrgizý kezinde naryqta beıtarap qaǵıdatyn saqtaıdy. Bul shetel valıýtasyn udaıy jáne birkelki satý degendi bildiredi. Mundaı tájirıbe Ulttyq qor operatsııalarynyń valıýta naryǵyna áserin barynsha azaıtýǵa múmkindik beredi.
Ulttyq bank BJZQ zeınetaqy aktıvteriniń valıýtalyq úlesin 30% deńgeıinde ustap turý úshin maýsymda bırjalyq saýda-sattyqta shetel valıýtasyn satyp aldy. Onyń jalpy somasy 240 mln AQSh dollaryn nemese naryqtyń jalpy kóleminiń shamamen 9%-yn qurady. Ulttyq bank maýsymda valıýtalyq ınterventsııalar júrgizgen joq.
Shilde aıynda Ulttyq qordan satýdyń naqty kólemi Qarjy mınıstrliginiń respýblıkalyq bıýdjetke transfert bólýge arnalǵan ótinimderine baılanysty bolady. Qajetti transfertter somasy boıynsha Qarjy mınıstrliginiń qolda bar boljamdyq baǵdarlary negizinde Ulttyq bank shildede Ulttyq qordan 550 mln AQSh dollarynan 600 mln AQSh dollaryna deıingi mólsherde valıýta satýdy aldyn ala josparlap otyr. Shildede BJZQ zeınetaqy aktıvteriniń valıýtalyq úlesin ustap turý úshin valıýta satyp alý 200 mln AQSh dollarynan 250 mln AQSh dollaryna deıingi mólsherde bolady.
Ulttyq bank transparenttilik qaǵıdaty aıasynda valıýta naryǵynda júrgiziletin barlyq operatsııa týraly aqparatty tolyqtaı ashyp kórsetetin bolady. Qysqamerzimdi perspektıvada teńgeniń dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady.
Ulttyq bank teńgerimsizdiktiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustanýdy jalǵastyrady.