Maýsym aıynda 29 mln kıbershabýyl toıtarylǵan

ASTANA. QazAqparat – «Memlekettik tehnıkalyq qyzmet» aktsıonerlik qoǵamy maýsym aıynda 29 mln kıbershabýyldy toıtarǵan, dep habarlaıdy QazAqparat tilshisi.

«Memlekettik tehnıkalyq qyzmet» AQ bıylǵy maýsymda Internetke qol jetkizýdiń biryńǵaı shlıýzi paıdalanylyp, 29 mılıonnan astam kıbershabýyl buǵattalǵanyn habarlaıdy.

Aqparattyq qaýipsizdik ıntsıdentteriniń sany azaıǵany baıqalady. Botnettiń eń kóp taraǵan túri Mozi.Botnet, njRAT.Botnet jáne Lethic.Botnet boldy.

Internettiń qazaqstandyq segmentin monıtorıngteý barysynda derekterdiń jarııa etilýi men olarǵa qol jetkizý táýekelderin týdyratyn birneshe osaldyqtar anyqtaldy», - dep jazady «Memlekettik tehnıkalyq qyzmet» mamandary.

Máselen, anyqtalǵan CWE-521: Weak Password Requirements osaldyǵy serverdiń senimsiz parolin paıdalanýǵa tyrysqan. Bul vırýstardyń eseptik derekterdi jarııa etýin ońaılatady.

«Al, CWE-200: Exposure of Sensitive Information to an Unauthorized Actor osaldyǵy konfıdentsıaldy aqparatqa ruqsatsyz qol jetkizýdiń yqtımal táýkelderine ákelip soǵady. Joıý úshin óndiristik ortada retke keltirý rejımin ajyratý qajet. Yqtımal táýekelder men qaterlerge jol bermeý úshin qyzmet usynymdar ázirlep, osaldyqtar anyqtalǵan ınternet resýrstar men IP-mekenjaı ıelerin elektrondyq poshta arqyly habarlandyrdy», - delingen resmı málimette.

«Memlekettik tehnıkalyq qyzmet» AQ mamandary ınternettegi derekterdi barynsha qorǵaý úshin parol tańdaǵan kezde sandardy, arnaıy sımvoldardy, joǵarǵy jáne tómengi tirkelim áripterin paıdalanyp, 8 sımvoldan kem emes etip ornatý qajettigin eske salady.