Maýsymda elektrondyq eńbek bırjasyna 94 myńnan astam bos jumys orny ornalastyryldy

<p>ASTANA. KAZINFORM &ndash; 2024 jyldyń maýsym aıynda Enbek.kz elektrondyq eńbek bırjasynda jumys berýshiler 94,4 myń bos jumys ornyn, al jumys izdeýshiler &ndash; 88,9 myń túıindeme ornalastyrdy. Mamyr aıymen salystyrǵanda bos oryndar sany 8,6 myń birlikke (+10%) ósti, al túıindeme &ndash; 9,6 myń birlikke (-9,7%) qysqardy.&nbsp;</p>

Bos jumys oryndarynyń jalpy ósýine qaramastan, fermerlerge, aýyl sharýashylyǵy, ónerkásip, qurylys jáne kólik jumysshylaryna suranystyń tómendeýi baıqaldy. Usynys berýshiler tarapynan aýyl sharýashylyǵy jumysshylary men óndiristik sektor operatorlarynyń túıindemeleri sanynyń tómendeýi baıqaldy. Bul rette biliktilik boıynsha suranys qurylymy ózgerissiz qaldy – orta bilikti jumysshylar eń joǵary suranysqa ıe boldy (32,8 myń bos jumys orny nemese 37%). 

Maýsym aıynda bilim berý (18,4 myń bos jumys orny), basqa da qyzmet túrleri (16,4 myń bos jumys orny), densaýlyq saqtaý (8,9 myń bos jumys orny) jáne qurylys (8,5 myń bos jumys orny) salalarynyń uıymdary eńbek naryǵynda dástúrli túrde joǵary belsendilik tanytty. Olardyń úlesi ornalastyrylǵan barlyq jumys oryndarynyń jartysynan kóbin qurady. 

Óńirlik bóliniste Atyraý (7 myń) jáne Jambyl (6,7 myń bos jumys orny) oblystarynyń, sondaı-aq Astana (6,7 myń) jáne Almaty (6,2 myń bos jumys orny) qalalarynyń jumys berýshileri belsendilik tanytty. Bul rette, ótken aımen salystyrǵanda Almaty jáne Atyraý oblystarynda bos oryndar sany eki ese ósken, al Astana qalasy men Batys Qazaqstan oblysynda suranys (tıisinshe 13% jáne 16% - ǵa) kerisinshe tómendedi. 

Túıindeme sanynyń artýy tek eki óńirde – Shymkent qalasynda (+240 túıindeme) jáne Atyraý oblysynda (+58 túıindeme) baıqaldy. Jumys izdeýshilerdiń belsendiligi Batys Qazaqstan (-30% nemese 1,6 myń túıindeme), Túrkistan (-20% nemese 2,4 myń túıindeme) jáne Soltústik Qazaqstan (-19% nemese 450 bos jumys orny) oblystarynda azaıdy. 

Maýsym aıynda bilikti qyzmetkerler arasynda eń tanymal mamandyqtar avtokólik júrgizýshileri (1,7 myń bos jumys orny), medbıkeler (1,6 myń bos jumys orny) jáne tárbıeshiler (1,5 myń bos jumys orny) boldy. Bul rette PR-menedjerlerge (+1,2 myń bos jumys orny), is júrgizýshilerge (+948 bos jumys orny) jáne avtomattandyrý ınjenerlerine (+235 bos jumys orny) suranys artty. 

Maýsym aıynda jumys berýshiler eń kóp jalaqyny bas qurylysshylarǵa (orta eseppen 662 myń teńgeden bastap), úńgileýshilerge (~612 myń teńge), sondaı-aq IT-qosymshalardy ázirleýshilerge (~563 myń teńge) usyndy.

Jumys izdeýshiler tarapynan basshylyq laýazymdarǵa úmitkerlerdi qospaǵanda, eń joǵary jalaqyny óz túıindemelerinde ushqyshtar (orta eseppen 1 mln teńgeden bastap), keme kapıtandary (~933 myń teńge) jáne kommertsııalyq kásiporyndardyń qurylymdyq bólimsheleriniń basshylary (~920 myń teńge) kórsetti.