Máýlen Áshimbaev jas dinı kóshbasshylardy jalǵan aqparatpen belsendi kúresýge shaqyrdy

<p>ASTANA. KAZINFORM &ndash; Senat tóraǵasy, Álemdik jáne dástúrli dinder kóshbasshylary sezi hatshylyǵynyń basshysy Máýlen Áshimbaev Jas dinı kóshbasshylar forýmyna álemniń 30-dan astam elinen kelgen jas dinı kóshbasshylar jınalǵanyn aıtty.&nbsp;</p>

«Biz búgin osy alańda qazirgi tańda búkil álemdi alańdatyp otyrǵan ózekti máselelerdi talqylaımyz. Bul bastama jas lıderler arasynda jan-jaqty dıalog qalyptastyratyn jáne qazirgi syn-qaterlerdi birlesip eńseretin jańa múmkindikterge jol ashatyn biregeı platformaǵa aınalady dep úmittenemiz. Búgingi tsıfrlyq ǵasyrda jalǵan jańalyqtar men burmalanǵan aqparattyń taralýy turaqtylyq pen beıbitshilikke úlken qaýip tóndirip tur. Ol shyndyqty burmalap, dushpandyq pen óshpendilik týdyrady. Sizder óz salańyzdyń kóshbasshysy retinde shynaıy aqparatty ǵana ilgeriletip, synı oılaý úlgisin kórsetý arqyly qoǵam sanasyna manıpýlıatsııa jasaý áreketterine qarsy tura alasyzdar», - dedi ol.

Senat spıkeri jas dinı kóshbasshylardyń halyqqa shyndyqty ótirikten ajyratýǵa kómektesip, jalǵan aqparat pen zııandy nasıhatqa tózbeýshilikti arttyrýy óte mańyzdy ekenin atap ótti.

«Bilim – kedeılik pen teńsizdikti jeńýdiń negizgi faktory. Bul – barshanyń gúldenýi men damýynyń qaınar kózi. Men sizderdi balalar men jastardyń sapaly bilimge qol jetkizýin jaqsartýǵa baǵyttalǵan bilim berý baǵdarlamalaryna belsendi qatysýǵa shaqyramyn. Inklıýzıvti bilim berýdi qoldaý jáne barlyq áleýmettik toptardaǵy adamdarǵa teń múmkindikterdi qamtamasyz etý óte mańyzdy», - dedi Máýlen Áshimbaev.

Aıta keteıik, atalmysh forým bıyl alǵash ret uıymdastyrylyp otyr.