Máýlen Áshimbaev Ýkraınadaǵy jaǵdaı týraly pikir bildirdi

<p>ASTANA. KAZINFORM &ndash; Senat tóraǵasy Máýlen Áshimbaev Astanada ótip jatqan Álemdik jáne dástúrli dinder kóshbasshylary sezi hatshylyǵynyń HHІІ otyrysynda Ýkraına men Taıaý Shyǵystyń máselesine toqtaldy.</p>

«Keıingi birneshe jylda adamzat buryn-sońdy bolmaǵan qıyndyqtarǵa tap keldi. Búgingi tańda álem jahandyq syn-qaterler men qaýipterdiń bári ózara shıelenisken ahýalynda tur. Taıaý Shyǵysta óte qıyn jaǵdaı qalyptasty. Bárimiz osy aımaqtaǵy shıelenistiń kúsheıgenine qatty alańdaımyz», - dedi spıker.

Senat tóraǵasy Qazaqstan osy shıeleniske qatysy bar taraptardyń bárin kúsh qoldanýdan bas tartýǵa shaqyratynyn atap ótti.

«Osyǵan baılanysty Taıaý Shyǵystaǵy kelispeýshilikterdi BUU Jarǵysy men halyqaralyq quqyq qaǵıdattary sheńberinde tek saıası-dıplomatııalyq jolmen sheshý úshin jedel sharalar qabyldaýdyń mańyzdylyǵyn atap ótemiz. Sonymen qatar, Ýkraınada qantógisti qaqtyǵys jalǵasyp jatyr. Jalpy, jer sharynda «ystyq núkteler» kóbeıip keledi. Qaqtyǵystardyń kúsheıýi sońǵy onjyldyqtardaǵy halyqaralyq qaýymdastyqtyń jetistikterine nuqsan keltirip otyr, qarýlaný jarysyna jáne eń bastysy, beıbit turǵyndardyń qaıǵy-qasireti men shyǵynyna ákelip jatyr», - dedi Máýlen Áshimbaev. 

Senat tóraǵasy ár túrli kúshterdiń radıkaldy ıdeologııany ilgeriletip, ksenofobııany qozdyrýǵa halyqaralyq shıelenisterdi paıdalanyp jatqanyn aıtty. 

«Álemde terrorıstik jáne ekstremıstik toptar qaıta jandandy. Bul jaǵymsyz tendentsııalar kedeılik pen teńsizdik, qorshaǵan ortanyń nasharlaýy jáne klımattyq daǵdarys sııaqty qıyndyqtardy kúsheıtedi», - dedi ol.