Máýlen Áshimbaev Shveıtsarııanyń Qazaqstandaǵy elshisimen kezdesti

<p>Parlament Senatynyń Tóraǵasy Máýlen Áshimbaev Shveıtsarııa Konfederatsııasynyń Qazaqstandaǵy Tótenshe jáne ókiletti elshisi Salman Balmen kezdesti. Suhbat barysynda taraptar eki el arasyndaǵy yntymaqtastyqty odan ári nyǵaıtý máselelerin talqylady, dep habarlaıdy <a href="https://kaz.inform.kz/" target="_blank" rel="noopener">Kazinform </a>Senattyń baspasóz qyzmetine silteme jasap.&nbsp;</p>

Senat Spıkeri Elshi Salman Baldy Qazaqstandaǵy qyzmetiniń bastalýymen quttyqtap, Shveıtsarııa Konfederatsııasy elimizdiń Eýropadaǵy mańyzdy saıası jáne ekonomıkalyq seriktesteriniń biri ekenin atap ótti. Osyǵan oraı ol halyqaralyq uıymdar aıasynda eki eldiń parlamentaralyq baılanysyn jandandyrýdyń mańyzdylyǵyna nazar aýdardy.

«Qazaqstan Parlamenti Shveıtsarııamen parlamentaralyq yntymaqtastyqty damytýǵa múddeli. Mundaı baılanys ekijaqty qarym-qatynastyń mańyzdy bóligi ekeni anyq. Bizdiń Parlamenttiń eki palatasynda da Shveıtsarııa Parlamentimen dostyq toptary jumys isteıdi. Olardyń áleýetin belsendi paıdalanýymyz kerek. Osy oraıda Parlament delegatsııalarynyń ózara saparlaryn uıymdastyrýǵa, sondaı-aq, Eýropadaǵy Qaýipsizdik jáne Yntymaqtastyq Uıymynyń Parlamenttik Assambleıasy, Parlamentaralyq Odaq sııaqty halyqaralyq uıymdar sheńberinde Shveıtsarııa depýtattarymen yntymaqtastyqty damytýǵa mol múmkindik bar», – dedi Máýlen Áshimbaev.

Kezdesý barysynda palata Tóraǵasy Qazaqstan men Shveıtsarııa arasyndaǵy dıplomatııalyq qatynastardyń ornaǵanyna 30 jyl tolǵanyn, osy ýaqyt ishinde ekijaqty yntymaqtastyq nyǵaıyp, túrli salalarda birlesken jobalar men baǵdarlamalar tabysty iske asyrylǵanyn atap ótti.

Sonymen qatar Máýlen Áshimbaev Qazaqstan Prezıdenti Qasym-Jomart Toqaevtyń bastamasymen elimizde iske asyrylyp jatqan aýqymdy saıası jańǵyrtý baǵdarlamasynyń nátıjelerine nazar aýdardy.

Senat Tóraǵasy rýhanı dıplomatııany damytý máselesine de basa mán berdi. Osy oraıda ol Shveıtsarııaǵa Álemdik jáne dástúrli dinder lıderleri Sezine belsendi qoldaý kórsetip, Forým maqsattaryna qol jetkizýge eleýli úlesi qosqany úshin rızashylyǵyn bildirdi.

Óz kezeginde Elshi Qazaqstanda júrgizilip jatqan qoǵamdyq-saıası ózgeristerdi joǵary baǵalap, eki el arasyndaǵy yntymaqtastyqty odan ári nyǵaıtýǵa múddeli ekenin bildirdi.