Máýlen Áshimbaev Reseı shekarasyndaǵy kidirister týraly: Olar tekserse, biz de tekserýimiz kerek

<p>Senat tóraǵasy Máýlen Áshimbaev Reseımen shekarada qazaqstandyq kásipkerlerdiń ónimderin tekserý merziminiń uzaqtyǵy problemaǵa aınalǵanyn aıtyp, Saýda jáne ıntegratsııa mınıstri Arman Shaqqalıevti jedel tıisti sharalar qabyldaýǵa shaqyrdy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Taıaýda barlyq áriptesterimiz óńirlerden oraldy. Ózim de Atyraý oblysyna baryp, jergilikti turǵyndarmen, kásipkerlermen jáne máslıhat depýtattarymen kezdestim. Sondaı kezdesýlerdiń birinde kásipkerler osy máseleni kóterip, Reseıge taýarlaryn jetkizgen kezde 15-20 kúnge deıingi merzimdi alatyn veterınarlyq, sanıtarlyq, fıtosanıtarlyq sııaqty túrli tekseristerden ótýge májbúr bolyp júrgenderin aıtty. Olar osyndaı ónimder bizdiń tarapqa kelgen kezde ne úshin veterınarlyq, sanıtarlyq, fıtosanıtarlyq jáne taǵy da basqa baqylaýlar tıisti deńgeıde júrgizilmeıtinin suraıdy. Negizi kelisim eki jaqqa birdeı. Eger bizdiń seriktesterimiz tekserip jatsa, biz de tekserýimiz kerek. Bul – ózara teńdikke qatysty másele. Eń bastysy, biz óz azamattarymyzdyń densaýlyǵyn qamtamasyz etýimiz qajet», – dedi ol Senat otyrysynda.

Palata spıkeri mundaı túıtkilder tıisti memlekettik organdardyń jumysty qajetti deńgeıde atqarmaýynan týyndaıtynyn aıtty.

«Osy máseleni óńirlerdegi turǵyndar jıi kóteredi. Bul neni bildiredi? Bul – memlekettik organdar tarapynan laıyqty jumys júrgizilmeıdi nemese biz kelisimniń sharttaryn tıisti deńgeıde oryndamaı otyrmyz degen sóz. Eger keıbir jerde kelisim talaptary óz deńgeıinde oryndalmaı jatsa, olardy iske asyrý úshin tıisti sharalar qabyldaǵan jón. Múmkin azamattarǵa qajetti aqparattar durys jetpeıtin shyǵar. Osy máseleni de nazarǵa alyp, zań aıasynda áreket etýimiz kerek», – dedi Senat tóraǵasy.