Máýlen Áshimbaev Malaızııa parlamenti senatynyń basshysymen kezdesti

<p>ASTANA. KAZINFORM &ndash; Senat spıkeri Máýlen Áshimbaev Malaızııa Parlamenti Senaty tóraǵasynyń mindetin atqarýshy Nýr Djazlan Mohamedpen kezdesti. Suhbat barysynda taraptar parlamentaralyq ózara is-qımyldy odan ári arttyrýǵa qatysty máselelerdi talqylady.</p>

Máýlen Áshimbaev Malaızııa Qazaqstannyń ońtústik-shyǵys Azııadaǵy mańyzdy saıası jáne ekonomıkalyq seriktesi ekenin atap ótti. Malaızııa Premer-Mınıstri Anýar Ibragımniń bıylǵy mamyrda Qazaqstanǵa jasaǵan resmı sapary ekijaqty baılanysty odan ári damytýǵa tyń serpin berdi. Bul sapar 2014 jyldan beri alǵash ret uıymdastyrylǵanyn aıta ketken jón. Qazaqstan Prezıdenti Qasym-Jomart Toqaev Anýar Ibragımmen kezdesý kezinde atalǵan sapardy «tarıhı» dep baǵalady.

Osyǵan baılanysty Máýlen Áshimbaev pen Nýr Djazlan Mohamed kezdesýde ekijaqty parlamentaralyq yntymaqtastyqty nyǵaıtý máselelerine basa mán berdi.

«Biz Malaızııamen parlamentaralyq qatynastardy damytýǵa múddelimiz. Eki eldiń Parlamentterinde «Qazaqstan-Malaızııa» dostyq toptary jumys isteıdi. Bul toptar – yntymaqtastyqtyń mańyzdy tetigi. Bizdiń qarym-qatynasymyzdyń ártúrli aspektilerin talqylaý jáne ilgeriletý úshin birlesken is-sharalar uıymdastyrýdyń da mańyzy zor», - dedi Máýlen Áshimbaev.

Kezdesý barysynda taraptar saýda-ekonomıkalyq jáne ınvestıtsııalyq yntymaqtastyq salasyndaǵy jetistikter men perspektıvalardy da talqylady. Sondaı-aq mádenı jáne bilim berý baılanystaryn keńeıtý, osy baǵytta birlesken jobalardy iske asyrý jóninde pikir almasty.

«Qazaqstan Malaızııamen saýda-ekonomıkalyq yntymaqtastyqty odan ári nyǵaıtýdy kózdeıdi. Qyzmet kórsetý, qarjy, óndiris, aýyl sharýashylyǵy, tamaq ónerkásibi jáne qurylys salasyndaǵy baılanystyń múmkindikteri keńeıip keledi. Qazaqstan Parlamentiniń Senaty osy yntymaqtastyqty zańnamalyq deńgeıde arttyrý úshin qoldaý kórsetýge daıyn. Parlamentterdiń bul baǵyttaǵy belsendi róli ekijaqty qarym-qatynasty nyǵaıtýǵa yqpal etedi dep senemin», - dedi  Senat tóraǵasy.

Sonymen qatar Máýlen Áshimbaev Memleket basshysynyń bastamasymen Qazaqstanda júrgizilip jatqan reformalardyń mańyzyna, olardyń iske asyrylý barysyna jáne eldiń jańa ekonomıkalyq modelin qalyptastyrý úshin qolǵa alynǵan sharalarǵa toqtaldy.

Óz kezeginde Nýr Djazlan Mohamed Qazaqstandaǵy saıası jáne áleýmettik-ekonomıkalyq transformatsııanyń tıimdiligine nazar aýdaryp, parlamentaralyq yntymaqtastyqty odan ári damytýǵa múddeli ekenin bildirdi.