Máýlen Áshimbaev: Qazaqstan Oksford ıslam zertteýleri ortalyǵymen baılanysty nyǵaıtýǵa múddeli

<p>ASTANA. KAZINFORM &ndash; Senat Tóraǵasy Máýlen Áshimbaev Oksford ıslam zertteýleri ortalyǵynyń dırektory Farhan Ahmad Nızamımen kezdesti. Іs-shara barysynda ǵylymı-zertteý jáne rýhanı dıplomatııa salasyndaǵy yntymaqtastyqty nyǵaıtý máseleleri talqylandy. Bul týraly QR Parlamentiniń Senaty baspasóz qyzmeti málim etti.&nbsp;</p>

Palata Spıkeri qazaqstandyq ǵalymdarmen belsendi baılanys ornatqany úshin Farhan Ahmed Nızamıge alǵys bildirip, bul qazirgi jahandyq máselelerdi sheshýge eki taraptyń ǵylymı qaýymdastyǵyn jumyldyrý jolyndaǵy mańyzdy qadam ekenin atap ótti.

Sonymen qatar ol Qazaqstan «Birlik – áralýandyqta» qaǵıdatyna taban tireıtinin aıtyp, Oksford ıslam zertteýleri ortalyǵymen baılanysty odan ári arttyrýǵa múddeli ekenin jetkizdi.

Kezdesý barysynda Álemdik jáne dástúrli dinder kóshbasshylary Seziniń beıbitshilik, senim jáne dıalog mádenıetin dáripteýdegi róli týraly da sóz boldy. Sondaı-aq Sezdiń aldaǵy 10 jylǵa arnalǵan Damý tujyrymdamasynda kózdelgen mindetterdi birlesip iske asyrýdyń mańyzdy ekeni aıtyldy.

«Qazaqstanda ótkizilip kele jatqan Álemdik jáne dástúrli dinder kóshbasshylarynyń Sezi jıyrma jyl ishinde dinder, mádenıetter jáne órkenıetter arasyndaǵy dıalogty dáripteıtin bedeldi ári moıyndalǵan halyqaralyq alańǵa aınaldy. Biz byltyr Sezdi damytýdyń aldaǵy on jylǵa arnalǵan Tujyrymdamasyn qabyldadyq. Forýmnyń qyzmeti klımattyń ózgerýi, teńsizdik, ekstremızm, soǵys sııaqty búginde álem betpe-bet kelip otyrǵan syn-qaterlerdi eńserýge járdemdesý úshin din kóshbasshylary, saıasatkerler jáne halyqaralyq uıymdar arasyndaǵy yntymaqtastyqty nyǵaıtýdy kózdeıdi. Bul rette rýhanı dıplomatııanyń áleýeti zor ekeni anyq. Sondyqtan biz sizderdiń Ortalyqtaryńyzben osy baǵyttaǵy birlesken is-qımyldy odan ári nyǵaıtýǵa múddelimiz», – dedi Máýlen Áshimbaev.

Óz kezeginde Farhan Ahmad Nızamı kezdesý úshin Máýlen Áshimbaevqa alǵys bildirip, eki tarap arasyndaǵy baılanystardy jáne ǵylymı-zertteý baǵytyndaǵy yntymaqtastyqty arttyrýǵa beıil ekenin jetkizdi.