Máýlen Áshimbaev Qasıetti Taqtyń Qazaqstandaǵy apostoldyq Nýntsıimen kezdesti

<p>ASTANA. KAZINFORM &ndash; Parlament Senatynyń Tóraǵasy Máýlen Áshimbaev Qasıetti Taqtyń Qazaqstandaǵy apostoldyq nýntsıi Djordj Djordj Panamtýndılmen kezdesti. Onda taraptar eki el arasyndaǵy yntymaqtastyqty nyǵaıtý jáne dinaralyq dıalogty ilgeriletý aıasynda seriktestikti odan ári keńeıtý máselelerin talqylady. Bul týraly QR Parlamentiniń Senaty baspasóz qyzmeti málim etti.&nbsp;</p>

Máýlen Áshimbaev Djordj Panamtýndıldi elimizdegi mıssııasynyń bastalýymen quttyqtap, Qazaqstan men Qasıetti Taq arasynda kelisimge jáne ózara syılastyqqa negizdelgen uzaq merzimdi seriktestik qarym-qatynas qalyptasqanyn atap ótti. Eki memleket arasyndaǵy dostyq baılanysty nyǵaıtýǵa joǵary deńgeıdegi belsendi jáne senimdi dıalog yqpal etip kele jatqanyn aıtty.

«Qazaqstan Prezıdenti Qasym-Jomart Kemeluly Toqaevtyń jaqynda Vatıkanǵa jasaǵan resmı sapary jáne Rım Papasy Frantsıskpen kezdesýi ekijaqty yntymaqtastyqty odan ári damytýǵa tyń serpin berdi. Biz konfessııaaralyq jáne órkenıetaralyq dıalogty damytý jolynda Qasıetti Taqtyń Dıkasterııasymen tyǵyz jáne nátıjeli yntymaqtastyqty ári qaraı nyǵaıtýǵa múddelimiz. Byltyr Qazaqstan men Vatıkan arasyndaǵy qosymsha kelisimdi ratıfıkatsııalaý úshin arnaıy zań qabyldandy. Qujat Qazaqstan Respýblıkasy men Qasıetti Taq arasyndaǵy dıplomatııalyq qatynastardy nyǵaıtýǵa, sondaı-aq, mádenıetaralyq jáne dinaralyq dıalogty odan ári damytýǵa yqpal etedi», – dedi Palata Spıkeri.

Kezdesý barysynda Senat Tóraǵasy Álemdik jáne dástúrli dinder lıderleri sezi birlesken kúsh-jigerdiń arqasynda dinder arasyndaǵy ózara túsinistik pen syılastyqty nyǵaıtýǵa arnalǵan alańǵa aınalǵanyn aıtyp, osy baǵyttaǵy jumysqa jan-jaqty jáne dáıekti qoldaý kórsetkeni úshin Vatıkan tarapyna rızashylyq bildirdi.

Sonymen qatar ol rýhanı dıplomatııany damytýdyń mańyzdy ekenine toqtalyp, Qazaqstannyń konfessııaaralyq kelisim jáne jahandyq dinaralyq dıalogty ilgeriletý salasyndaǵy bastamalary týraly aıtty.

«Byltyrǵy qazan aıynda biz Álemdik jáne dástúrli dinder lıderleri Sezi Hatshylyǵynyń XXI otyrysyn ótkizdik. Sonyń nátıjesinde Sezdi damytý Tujyrymdamasy qabyldandy. Qujatta qazaqstandyq Forýmdy damytýdyń aldaǵy on jylǵa arnalǵan jańartylǵan baǵyt-baǵdary aıqyndaldy. Bul rette rýhanı dıplomatııanyń áleýeti zor ekenin atap ótken jón. Osyǵan baılanysty Sezdiń qyzmeti terrorızm, ekstremızm, teńsizdik, kedeılik, klımattyń ózgerýi sııaqty qazirgi jahandyq problemalardy sheshýge yqpal etý maqsatymen din kóshbasshylary, saıasatkerler men halyqaralyq uıymdar arasyndaǵy yntymaqtastyqty nyǵaıtýǵa baǵyttalady», – degen Máýlen Áshimbaev birlesken jumystyń basym baǵyttaryna nazar aýdardy.

Kezdesý kezinde Djordj Panamtýndıl Qasıetti Taq Qazaqstannyń beıbitshilik ıdeıalaryn, barlyq dinderdegi adamdardyń ıgiligi úshin mádenıetter men dinder arasyndaǵy turaqty dıalogty ilgeriletý jolyndaǵy bastamalaryn qoldaıtynyn aıtty. Sondaı-aq ol Qazaqstanmen ózara is-qımyldy odan ári nyǵaıtýǵa múddeli ekenin jetkizdi.