Máýlen Áshimbaev: Balalarǵa qazaqsha kontent jasaýshylardy qoldaý bir kúndik shara bolmaý kerek
Parlament Senaty Mass-medıa týraly Májilis qabyldaǵan úsh birdeı zańdy qarap jatyr. Áńgime «Mass-medıa týraly», «Keıbir zańnamalyq aktilerge mass-medıa máseleleri boıynsha ózgerister men tolyqtyrýlar engizý týraly», «Ákimshilik quqyq buzý týraly kodekske mass-medıa máseleleri boıynsha ózgerister engizý týraly» zańdar týraly bolyp otyr.
Negizgi zańdy talqylaý kezinde spıker M.Áshimbaev Mádenıet jáne aqparat vıtse-mınıstri Qanat Ysqaqovqa naqty usynys aıtty.
«Qanat Jumabaıuly, osy máselege oraı jáne ekinshi suraqqa baılanysty aıtsaq, keshe qazaq tilinde kontent jasaıtyn kreatıvti ındýstrııa ókilderiniń forýmyna qatysyp keldik. Sol jerde de osy qazaq tilinde balalarǵa kontent jasap júrgen mamandar biraz máseleni kóterdi. Bári qarjylyq kómek máselesin aıtyp jatyr. Sondaı-aq, marketıng máseleleri de tilge tıek boldy. Jalpy aqparattarǵa qol jetkizý múmkindikteri týraly da máseleler kóterip jatyr. Sizder aqyldasyp, Mass-medıa týraly zańdy depýtattar qabyldap jatsa, sonyń aıasynda balalarǵa qazaq tilinde kontent jasap júrgen mamandardy ortalyqtardy qoldaýlaryńyz kerek. Bizde óte jaqsy, jas mamandar ósip kele jatyr. Keshe biz olardy kórdik, oılaryna, usynystaryna rıza boldyq. Biz jalpy memleket tarapynan osyndaı kompanııalarǵa bir kúndik emes, júıeli túrde kómek berýimiz kerek. Grant kúıinde bolsyn, basqa formalarda bolsyn, jas talanttardy qoldaý baǵytynda jumys isteýimiz kerek», - dedi Senat tóraǵasy.