Máýlen Áshimbaev Almaty oblysynyń turǵyndarymen AES salý máselesin talqylady

<p>ALMATY. KAZINFORM &ndash; Parlament Senatynyń móraǵasy Máýlen Áshimbaev bastaǵan Atom elektr stansasyn salýdy qoldaý jónindegi Halyqtyq shtabtyń músheleri búgin Almaty oblysyna keldi. Shtab quramynda depýtattar, sarapshylar jáne qoǵam qaıratkerleri bar. Olar óńirde kásiporyn ujymdarymen, kásipkerlermen jáne jergilikti jurtshylyqpen kezdesip, Qazaqstanda AES salýǵa qatysty referendým ótkizý máselelerin talqylady.</p>

Máýlen Áshimbaev oblys jurtshylyǵymen kezdesýde Memleket basshysynyń AES salý máselesine qatysty jalpyulttyq referendým ótkizý týraly bastamasynyń mańyzyna nazar aýdardy.

«Búgin biz Prezıdentimiz Qasym-Jomart Kemeluly Toqaevtyń AES salý máselesi boıynsha jalpyulttyq referendým ótkizý týraly bastamasyn talqylaý úshin arnaıy kelip turmyz. Mundaı mańyzdy máseleni daýysqa salý «Halyq únine qulaq asatyn memleket» tujyrymdamasynyń jarqyn kórinisi ekeni sózsiz. Bul rette ár azamattyń daýsy úlken mánge ıe. Sondyqtan biz eldiń bolashaǵy úshin durys sheshim qabyldaýymyz kerek», - dedi Máýlen Áshimbaev. 

Sonymen qatar Shtab músheleri «GREEN Land ALATAU» jylyjaıyna bardy. Onda otandyq kásiporyndardy energııamen turaqty qamtamasyz etý máselesine basa mán berildi. Qazirgi tańda eldiń energetıkalyq sektory negizinen kómir elektr stansalaryna táýeldi. Kezdesýde senimdi jáne qaýipsiz energııa kózi aýyl sharýashylyǵy taýaryn óndirýshilerdiń turaqty damýy úshin de asa mańyzdy ekeni sóz boldy.

Óńirdegi shaǵyn jáne orta bıznes ókilderimen kezdesý barysynda Senat tóraǵasy jańa jumys oryndaryn ashýdyń jáne iri jobalardy iske asyrýǵa yqpal etetin ınfraqurylymdy damytýdyń mańyzyna toqtaldy. Sondaı-aq ǵylymı-tehnıkalyq progrestiń, energetıkadaǵy ınnovatsııalyq tehnologııalardyń, joǵary tehnologııalyq sektordyń jáne Qazaqstandaǵy ǵylymı zertteýlerdiń mańyzy da áńgimege arqaý boldy. 

Almaty oblysyna sapar aıasynda Halyqtyq shtabtyń músheleri Sh.Shókın atyndaǵy Qapshaǵaı GES-iniń qyzmetimen tanysyp, stansa mamandarymen jáne basshylyǵymen energetıka salasyn damytý perspektıvalaryn talqylady.