Máýlen Áshimbaev: Akselerator – ornyqty damý maqsattaryna qol jetkizýdiń tıimdi tetigi
Bul – Senattyń Jobalyq keńsesi, Maqsut Narikbayev University jáne Aqmola oblysy ákimdiginiń birlesken bastamasy. Joba aıasynda zańnamany jetildirý jáne óńirlerdi ornyqty damytý jónindegi praktıkalyq sheshimder men usynystar toptamasy qarastyryldy. Saraptamalyq zertteýlerdi talqylaýǵa Parlament Senatynyń Tóraǵasy Máýlen Áshimbaev, halyqaralyq uıymdardyń Qazaqstandaǵy ókildikteriniń basshylary jáne zertteý ınstıtýttarynyń sarapshylary qatysty.
Máýlen Áshimbaev óz sózinde Senattyń Qoǵamdyq Jobalyq keńsesi men Maqsut Narikbayev University birlesip iske asyrǵan Akselerator biregeı bastama ekenin jáne ol eldiń ornyqty damýyna qatysty jańa ıdeıalar men naqty usynystar ázirleýdi kózdeıtinin aıtty. Bul baǵyttaǵy jumystarǵa Memleket basshysy da basa mán berip otyr.
«Prezıdentimiz Qasym-Jomart Kemeluly Toqaev shildeniń aıaǵynda Qazaqstannyń 2029 jylǵa deıingi ulttyq damý josparyn bekitti. Atalǵan qujatta aıqyndalǵan tásilder negizinen ulttyq jáne óńirlik deńgeıde Ornyqty damý maqsattaryna qol jetkizýdi jedeldetýge arnalǵan. Bul rette Akselerator Ornyqty damý maqsattaryna túrli baǵytta qol jetkizýdiń tıimdi tetigi ekenin atap ótken jón», – dedi Palata Spıkeri
Kópshilikke tanystyrylǵan «SDG IMPACT REPORT 2024» jarııa esebi Akseleratordyń 100 kúnge jalǵasqan jumysynyń naqty nátıjesi. Esepte zańnamany jetildirý boıynsha usynystar jáne Aqmola oblysynda iske asyrylǵan pılottyq jobalar men bastamalar jóninde jobalyq qujattama qamtylǵan.
«Akseleratordyń jetistigi, eń aldymen, senatorlardyń mentor retinde qyzmet etýi. Bul jobanyń biregeıligi – biz memlekettik sektorlardy, úkimettik emes uıymdardy, kvazımemlekettik sektorlardy, ǵalymdardy, halyqaralyq uıymdardy, BAQ jáne basqa da sarapshylardy biriktire aldyq», - dep atap ótti MIND jetekshisi Altaır Ahmetov.
Іs-sharaǵa Qazaqstan Respýblıkasy Prezıdentiniń ǵylym jáne ınnovatsııalar máseleleri jónindegi keńesshisi Kúnsulý Zakarııa, Aqmola oblysynyń basshylyǵy, BUU-nyń Qazaqstandaǵy Turaqty úılestirýshisi Mıkaela Frıberg-Storı, Qazaqstandaǵy BUU Damý Baǵdarlamasynyń Turaqty ókili Katarjına Vavernıa, Parlament depýtattary jáne taǵy basqa sarapshylar qatysty.