Máýlen Áshimbaev: Jastarymyzdyń otanshyldyq rýhyna, jigerine senim artamyz
«Qazir álemdik ahýal asa kúrdeli ekenin kórip otyrmyz. Syn-qaterler jeterlik. Osyndaı shıelenisti kezeńde eldigimizdi nyǵaıtý – bizdiń eń basty maqsatymyz. Bul – barshamyzǵa ortaq eldik murat. Eldik pen egemendik jolynda bárimiz judyryqtaı jumylýymyz qajet. Ózderińizge jaqsy belgili, qazir elimiz úlken ózgeristerdi bastan ótkerip jatyr. Olardyń barlyǵy ádiletti Qazaqstan qurý qaǵıdasyna taban tireıdi. Prezıdentimiz Qasym-Jomart Kemeluly Toqaevtyń bastamasymen saıası júıemiz túbegeıli transformatsııaǵa túsip jatyr. Bılik tarmaqtarynyń tepe-teńdigi artyp, eseptilik pen ashyqtyqty qamtamasyz etetin mańyzdy ózgerister bolyp jatyr», - dedi M. Áshimbaev «Egemendik jáne Qazaqstannyń saıası-quqyqtyq transformatsııasy» taqyrybyna arnalǵan Senattaǵy «Ulttyq múdde» dıalog alańy otyrysynda.
Osy oraıda ol Konstıtýtsııalyq sot qurylatynyn, Adam quqyǵyn qorǵaý jónindegi ýákildiń mártebesi de buryn bolmaǵan deńgeıge kóterilgenin atap ótti.
«Ádilettilik tek saıası júıede emes, áleýmettik jáne ekonomıkalyq salalar úshin de basty qaǵıdaǵa aınala bastady. Halyqtyń áleýmettik qorǵalýyn qamtamasyz etý sharalary qarqyndy túrde kúsheıip keledi. Mundaı naqty sharalardyń bári, túptep kelgende, egemendigimiz ben táýelsizdigimizdi nyǵaıtatyny sózsiz. Osyndaı jumystardyń aıasynda biz aǵa býynnyń bilimine, ómirlik tájirıbesine jáne parasat-paıymyna taban tireıimiz. Sondaı-aq, jastarymyzdyń otanshyldyq rýhyna, jigeri men jalynyna senim artamyz. Aldaǵy ýaqytta da Senat aǵa býynmen de, jastarmen de turaqty bas qosyp, keńesip jumys isteı beredi. Dana halqymyz «Yrys aldy – yntymaq» dep beker aıtpaǵan. Biz ult bolyp uıyssaq qana alǵa qoıǵan maqsattarymyzǵa qol jetkizetinimiz anyq. Osy baǵytta bárimiz birlesip, elimiz úshin eseli eńbek ete beremiz dep senemin», - dedi Senat tóraǵasy.
Budan buryn habarlanǵandaı, Senat tóraǵasy 25 qazan elimiz úshin azattyqqa umtylys jolynda taǵdyrsheshti nátıjege qol jetkizgen kún retinde qadirli ekenin atap ótti.Sondaı-aq, Táýelsizdik kúniniń róli alasarmaıtynyn, 16 jeltoqsannyń máni tereń, qadiri erekshe ekenin aıtty.