Máýlen Áshimbaev: Ulttyq qundylyqtardy dáripteý de Senat jumysynyń basym baǵyty

NUR-SULTAN. QazAqparat – Elordadaǵy Ulttyq akademııalyq kitaphanada ótip jatqan «Shyǵystyń shoqjuldyzdary» atty halyqaralyq konferentsııada Senat Tóraǵasy Máýlen Áshimbaev ulttyq qundylyqtardy dáripteý baǵytyndaǵy jumystarǵa toqtaldy, dep habarlaıdy QazAqparat tilshisi.

«Álem túrki jurtynyń rýhanı áleýetin uly tulǵalarymyz ben olardyń ómirsheń týyndylary arqyly tanıdy. Osynaý alyp shaıyrlardyń murasy máńgilik jasampazdyq kúshke ıe.

Tipti olardy túrki halyqtarynyń ózara baýyrlastyǵynyń altyn dińgegi desek te qatelespeımiz. Sol sebepti, olardyń murasyn jaryqqa shyǵarý, aýdarý, zertteý – bizderge mindet. Osy mindettiń údesinen shyǵa bilgen Akademııaǵa jáne onyń ujymyna úlken alǵys aıtamyz», - degen Senat Tóraǵasy bul jumys ári qaraı da tabysty jalǵasatynyna senim bildirdi.

«Jalpy, ulttyq qundylyqtardy dáripteý, ulttyq sanany jańǵyrtý Senat jumysynyń da negizgi basymdyqtarynyń biri. Qazirgi tańda ulttyq biregeılikti nyǵaıtý, ulttyq kodty saqtaý asa mańyzdy. Osy baǵytta parlamenttik tyńdaýlar, dóńgelek ústelder taǵy da basqa is-sharalardy turaqty ótkizip kelemiz.

Senatorlar ózderiniń depýtattyq saýaldary arqyly da bul saladaǵy biraz máseleni kóterip júr.

Senatorlardyń birqatar usynystary «Ulttyq rýhanı jańǵyrý» ulttyq jobasyn ázirleý barysynda da eskerildi. Aldaǵy ýaqytta osy baǵyttaǵy jumystar jalǵasa beredi», - dedi Máýlen Áshimbaev.