Máýlen Áshimbaev: Úlkenderge qurmet kórsetip, qamqorlyq tanytý bizdiń perzenttik boryshymyz

NUR-SULTAN. QazAqparat – Senat tóraǵasy eloardadaǵy birqatan nysandarda bolyp, turǵyndardy Naýryz merekesimen quttyqtady, dep habarlaıdy QazAqparat.

«Memleket basshysy múgedektigi bar azamattarǵa júıeli túrde qoldaý kórsetýge únemi basa mán berip keledi. Bul sala Senat jumysynyń da negizgi baǵyttarynyń biri. Osyǵan oraı búgin elordamyzdaǵy «GreenTAL» áleýmettik sheberhanasyna arnaıy baryp, kásiporyn jumysshylaryn Naýryz meıramymen quttyqtadyq».-dep jazdy, Máýlen Áshimbaev óziniń Facebook paraqshsynda.

Sondaı-aq ol sózinde «GreenTAL» – múgedektigi bar adamdardy, balalar úıiniń túlekterin jáne basqa da áleýmettik osal toptaǵy azamattardy oqytyp, jumyspen qamtyp otyrǵan mańyzdy jobalardyń biri ekendigin eske saldy. Qazirgi tańda bul jerde aǵash, tigin tsehtary, baspahana jáne bezendirý stýdııasy jumys isteıdi.

«Osyndaı tyń bastamany tabysty iske asyryp otyrǵan áleýmettik kásipker Emın Askerov ke alǵysymyzdy bildiremiz. Sonymen qatar búgin elorda ákimi Altay Kulginov -pen birge «Sharapat» áleýmettik qyzmet kórsetý ortalyǵyna da at basyn buryp, ondaǵy qamkóńil jandardy Ulystyń uly kúnimen quttyqtap shyqtyq. Bul ortalyqta jasy kelgen jáne múgedektigi bar adamdarǵa sapaly kútim jasaý úshin tolyq keshendi qyzmet kórsetiledi.

Ortalyq turǵyndarynyń arasynda soǵys jáne eńbek ardagerleri bar. Adam qartaıǵan shaǵynda bir aýyz jyly sóz ben iltıpatqa kóbirek muqtaj bolatyny aıtpasa da túsinikti. Sondyqtan búgin qarııalarymyzdy quttyqtap, aǵa býynǵa eldik múdde jolyndaǵy erik-jigeri men qajyrly eńbegi úshin alǵysymyzdy bildirdik.

Úlkenderimizge qurmet kórsetip, qamqorlyq tanytý – qashanda bizdiń perzenttik jáne azamattyq boryshymyz. Bul – ultymyzdyń qanyna sińgen qasıet. Sol sebepti, memlekettik organdar bul baǵytta ári qaraı da júıeli jumys júrgizip, áleýmettik qoldaý sharalaryn arttyra beredi»,-deıdi Sent tóraǵasy.