Máýlen Áshimbaev: «Taldaý mektebiniń» vıdeodáristeri YouTube-arnasyna jarııalanyp jatyr

ASTANA. QazAqparat - Bıyl jyl basynda «Taldaý mektebiniń» ekinshi kezeńi aıasynda oqytý kýrsy ótkizildi. Bul – Senat janyndaǵy Jas sarapshylar klýbynyń bastamasymen qolǵa alynǵan qoǵamdyq joba. Senat Tóraǵasy Máýlen Áshimbaev bul jobaǵa qatysty óz pikirin bildirdi, dep habarlaıdy QazAqparat.

«Segiz aptaǵa jalǵasqan joba barysynda jas mamandar taldaý qabiletin jetildirýge arnalǵan arnaıy baǵdarlama boıynsha bilim alyp, analıtıkalyq materıaldardy daıyndaý tásilderi men tehnologııalaryn meńgerdi.

Kýrs aıasynda qazaqstandyq jáne sheteldik sarapshylar men mamandar dáris oqydy. Sondaı-aq, olar trenıngter men tájirıbelik sabaqtar ótkizdi.

Osy aralyqta analıtıka jasaýdyń qyr-syryn úıretetin sapaly kontentter jınalǵanyn atap ótken jón. Sondyqtan olardy qalyń kópshilikpen bólisýdi jón kórdik. Osyǵan oraı ekinshi kezeńdegi vıdeodárister «Taldaý mektebiniń» YouTube-arnasyna jarııalanyp jatyr», - dedi Senat Tóraǵasy.

Ázirge atalǵan arnada ekonomıst, qoǵam qaıratkeri Jaqsybek Qulekeevtiń, saıasattanýshy Ekaterına Shýlmannyń jáne Máýlen Áshimbaevtyń dáristeri jarııalanǵan. Jaqyn arada jobaǵa qatysqan basqa da sarapshylardyń sabaqtary kópshiliktiń nazaryna usynylady.

«Aldaǵy ýaqytta «Taldaý mektebiniń» bul materıaldary jas mamandarmen birge analıtıkalyq zertteýlermen kásibı túrde aınalysyp kele jatqan tájirıbeli áriptesterimizdiń de ıgiligine jaraıtyn paıdaly dúnıe bolady dep senemiz», - dep túıdi sózin Máýlen Áshimbaev.