Máýlen Áshimbaev Taldaý mektebiniń qatysýshylaryna sertıfıkattar tabystady
Taldaý mektebin qurý týraly bastamany Senat janyndaǵy Jas sarapshylar klýbynyń músheleri kóterip, ony palata Tóraǵasy Máýlen Áshimbaev qoldaǵan edi. Jobaǵa qatysý úshin 260-tan astam ótinim kelip tústi. Konkýrstyq komıssııa alǵashqy topqa 40 adamdy iriktep aldy.
Ótken eki aıdyń ishinde Taldaý mektebiniń tyńdaýshylary taldaý qabiletin arttyrý jáne analıtıkalyq materıaldar daıarlaý tásilin jetildirý boıynsha dárister tyńdap, bilim aldy. Oqytý kýrsy teorııalyq jáne tájirıbelik kezeńnen turdy. Dáris oqýǵa qazaqstandyq jáne sheteldik belgili sarapshylar shaqyryldy. Olar jobaǵa qatysýshylarǵa analıtıka jasaýdyń túrli tásilderin úıretip, óz tájirıbelerimen bólisti.
Mekteptiń alǵashqy kezeńin qorytyndylaǵan Máýlen Áshimbaev álemdegi qazirgi ahýalǵa nazar aýdaryp, soǵan baılanysty barlyq salada analıtıka jasaýdyń mańyzy arta túskenin aıtty.
«Qazirgi tańda álemde geosaıası ahýaldyń shıelenise túskenin kórip otyrmyz. Jyl basynda biz de qaýipsizdigimizge tóngen kúrdeli syn-qatermen betpe-bet keldik. Munyń bári halyqaralyq qatynas, ishki saıasat, saıası jáne áleýmettik-ekonomıkalyq boljam jasaý sııaqty túrli salada analıtıkalyq tásildi kúsheıtýdiń mańyzdy ekenin kórsetedi. Sondyqtan Taldaý mektebi der kezinde qolǵa alynǵan jáne qajetti joba boldy deýge tolyq negiz bar», – dedi Senat Spıkeri.
Taldaý mektebi aǵa býyn analıtıkterdiń tájirıbesin jastarǵa úıretýge jáne taldaýdyń qyr-syryn meńgerýine yqpal etti. Máýlen Áshimbaev bul – jobanyń negizgi mindetteriniń biri bolǵanyn atap ótti. Sondaı-aq Senat Tóraǵasy mekteptiń taǵy bir mańyzdy tusy retinde osy saladaǵy áriptesterdiń bir-birimen baılanysýyn, kásibı kommýnıkatsııanyń qalyptasýyn jáne netvorkıngtiń keńeıýin aıtty.
«Bul mektep túrli saladaǵy jas sarapshylardyń ózara kommýnıkatsııa alańyna aınaldy. Qazirgi tańda kóptegen jobalar salaaralyq sıpatqa ıe. Bul óte mańyzdy baǵyt. Sizder osy ýaqyt aralyǵynda bilimderińizdi arttyryp, qabiletterińizdi shyńdap, mol tájirıbe jınadyńyzdar dep senemiz», – dedi Máýlen Áshimbaev.
Іs-shara sońynda Senat Tóraǵasy kýrs tyńdaýshylaryna sertıfıkattar tapsyryp, aldaǵy ýaqytta mektep jumysy túrli formatta jalǵasatynyn jetkizdi. Al, alǵashqy kezeńge qatysqan sarapshylar Parlament Senatynyń zań shyǵarý jumysyna jáne palata iske asyratyn basqa da túrli jobalarǵa jumyldyrylady.