Máýlen Áshimbaev sottalǵan Kúdebaevtyń túrmedegi sýreti jaıynda: Zańdy kúsheıtýge daıynbyz
3 qyrkúıekte áleýmettik jelide Atbasar aýdanyndaǵy №1 túzeý mekemesiniń qyzmetkerleri sottalǵandarǵa kúsh qoldanǵany týraly vıdeo taraǵan bolatyn.
«Osy oqıǵa boıynsha tıisti tergeý júrgizilip, jaýaptylardyń barlyǵy zań aıasynda jazaǵa tartylady. Oǵan eshqandaı kúmán bolmaýy tıis. Bul máselelerdi eskere otyryp, Qylmystyq kodeksti taǵy qarap shyǵamyz. Sondyqtan qajet bolǵan jaǵdaıda, tıisti normalardy pysyqtaýǵa daıynbyz. Jalpy, mundaı jaǵdaılardy boldyrmaý úshin quqyqqorǵaý organdary tıisti is-sharalardy júzege asyrýy kerek», - dedi M. Áshimbaev Senattyń jalpy otyrysynan keıin tilshiler suraǵyna jaýap bere otyryp.
Sonymen qatar tilshiler Almaty oblystyq Polıtsııa departamentiniń burynǵy bastyǵy, Qańtar oqıǵasynan keıin sottalǵan Serik Kúdebaevtyń Óskemen túrmesindegi sýretine qatysty surady. «Serik Kúdebaev jáne ózge sottalǵandar túrmede dastarhan jaıyp, toıda otyrǵandaı sýretke túsken. Bul oqıǵa túrmege smartfondar emin-erkin kirgizilip jatyr degendi bildire me?», - dep suraq qoıdy tilshiler.
Óz kezeginde Senat tóraǵasy qylmystyq-atqarý júıesindegi bul derekter salada biraz problema bar ekenin kórsetkenin aıtty.
«Senattyń Konstıtýtsııalyq zańnama, sot júıesi jáne quqyq qorǵaý organdary komıteti bar jáne bul komıtet quqyq qorǵaý organdarymen tyǵyz baılanysta jumys istep jatyr. Atalǵan komıtet quramyndaǵy depýtattar Úkimet múshelerin shaqyryp, bul máselege qatysty taldaý jasaımyz. Qylmystyq-atqarý júıesinde problemalardyń bar ekenin moıyndaýymyz kerek», - dedi palata tóraǵasy.
Budan buryn habarlanǵandaı, Serik Kúdebaev 28 sáýir kúni 10 jylǵa sottalǵan bolatyn. Oǵan laýazymdyq ókilettigin asyra paıdalaný jáne azaptaý baptary boıynsha aıyp taǵyldy.