Máýlen Áshimbaev: Saılaýdyń ádil ári ashyq ótýine barlyq jaǵdaı jasalǵan
Senat tóraǵasy Astana qalasyndaǵy №111 saılaý ýchaskesinde daýys berdi.
«Búgingi kún elimiz úshin mańyzdy, Prezıdent saılaýy ótip jatyr. Saılaý elimizdiń aldaǵy damýynyń baǵyt-baǵdaryn aıqyndaıdy. Bizdiń elimiz úshin sońǵy jyldary ońaı bolmady. Pandemııa el ekonomıkasy men halqymyzǵa aýyr tıdi. Koronavırýsty bárimiz birge eńserdik. Bıyl Almatydaǵy qańtar oqıǵasy bárimizdiń qabyrǵamyzdy qaıystyrdy. Qazir álemdegi geosaıası jaǵdaı ýshyǵyp tur. Degenmen qıyndyqtarǵa qaramastan Qazaqstan halqynyń birligi myqty», - dedi Máýlen Áshimbaev BAQ ókilderiniń suraǵyna jaýap bere turyp.
Senat basshysynyń aıtýynsha, búgin ár qazaqstandyqtyń óz tańdaýyn jasaıtyn kún.
«Bıyl maýsymda referendým ótti. Onyń negizinde Konstıtýtsııamyzǵa birqatar ózgeris engizildi. Atap aıtqanda, saıası ózgerister saılaýǵa da qatysty. Búgin halyq 7 jylǵa, bir retke Qazaqstan prezıdentin saılaıdy. Saılaýdyń ádil ári ashyq ótýine barlyq jaǵdaı jasaldy. Kandıdattarǵa da teńdeı múmkindik berildi. Daýys berý barysyn halyqaralyq baıqaýshylar qadaǵalap jatyr. Prezıdent saılaýynyń Qazaqstan zańnamalary men halyqaralyq standarttarǵa saı ótetinine senimdimin», - deıdi ol.
Foto: senate.parlam.kz