Máýlen Áshimbaev Sátbaev qalasy men Shornaq aýylynda bolǵan oqıǵalarǵa pikir bildirdi
«Taıaýda ǵana Sátbaev qalasy men Shornaq aýylynda bolǵan oqıǵalar el kóńiline qaıaý túsirdi. Qazirgi tańda halqymyz bul máselelerge baılanysty úlken alańdaýshylyq bildirip otyr.
Sátbaevtaǵy jaǵdaıǵa qatysty qoǵamnyń narazylyǵy oryndy. Rasymen, bul oqıǵa bárimizdiń júregimizdi aýyrtyp, janymyzdy jabyrqatty. Barlyq ata-analardyń ashýy men yzasy da túsinikti. Degenmen, osyndaı qylmyskerlerdi jazalaý zań negizinde júrgizilýi kerek. Búldirshinge zorlyq-zombylyq kórsetkender zań aldynda qatań jaýap beredi. Ol – aqıqat nárse. Eshkimniń buǵan kúmáni bolmaýy kerek», dep jazazy Máýlen Áshimbaev óziniń jelidegi paraqshasynda .
Onyń aıtýynsha, byltyr Memleket basshysy halyqqa Joldaýynda bala quqyǵyn qorǵaý máselesine aıryqsha nazar aýdaryp, olarǵa qatysty jasalatyn qylmystarǵa jazany kúsheıtý týraly tapsyrma bergen bolatyn.
«Soǵan baılanysty Parlament Qylmystyq kodekske irgeli ózgerister engizdi. Búginde búldirshinderge qatysty jasalǵan zorlyq-zombylyq faktisi boıynsha qylmysker jıyrma jylǵa nemese ómir boıyna bas bostandyǵynan aıyrylýy múmkin.
Sonymen qatar, zorlyq-zombylyq áreketi orta sanattan aýyr dárejeli qylmys túrine ózgertildi. Mundaı jaǵdaıda taraptar tatýlasa almaıdy. Burynǵy tájirıbede taraptardyń ózara tatýlasýynyń nátıjesinde talaı adamnyń qylmystan jaltaryp ketkeni belgili. Endi ondaı olqylyqqa jol joq.
Jańa zań normalaryna sáıkes mundaı qylmys jasaǵandar túrmeden merziminen buryn bosap ta shyǵa almaıdy, raqymshylyqqa da ilinbeıdi. Sondyqtan qoldanystaǵy zańnama boıynsha qylmyskerlerdi bultartpas aýyr jaza kútip tur», - dep tolyqtyrdy Senat Tóraǵasy.
Sondaı-aq, M. Áshimbaev Shornaqta bolǵan jaǵdaıǵa qatysty óziniń pikirin bildirdi.
«Shornaqta áleýmettik-turmystyq janjal oryn alǵany belgili. Biraq muny keıbireýler etnosaralyq janjalǵa aınaldyrǵysy kelip, jelilerde jalǵan aqparattar, zańsyz áreketterge shaqyrǵan úndeýler taratýda.
Desek te, biz quqyqtyq memlekette ómir súrip jatyrmyz. Sol sebepti, kez kelgen másele zań sheńberinde sheshilýi kerek. Sonda ǵana zań ústemdigi ornaǵan, ár azamattyń quqyǵy qorǵalatyn, qaýipsizdigi qamtamasyz etiletin órkenıetti qoǵam qura alamyz.
Qazirgi tańda indetpen betpe-bet kelgen elimiz kúrdeli kezeńdi bastan ótkerýde. Osyndaı syn-saǵatta birligimizge syzat túsirmeý – asa mańyzdy. Sol úshin ár nárseni aqylǵa jeńdirip, áreket eteıik», - dedi Senat Tóraǵasy.