Máýlen Áshimbaev Rýmynııa parlamentshilerimen kezdesti
Taraptar kezdesý barysynda Qazaqstan men Rýmynııanyń parlamentaralyq qarym-qatynastaryn odan ári damytý keleshegin talqylady.
Máýlen Áshimbaev táýelsizdik jyldary eki el arasynda joǵary deńgeıde senimdi saıası dıalog ornaǵanyn atap ótti.
Senat tóraǵasy Memleket basshysy Qasym-Jomart Toqaev pen Qazaqstannyń Tuńǵysh Prezıdenti – Elbasy Nursultan Nazarbaev Nur-Sultan men Býharest arasyndaǵy dostyq jáne ózara tıimdi qarym-qatynastardy nyǵaıtýǵa basa nazar aýdaryp otyrǵanyn atap ótti.
Senat spıkeri eki el parlamentteriniń baılanystary boıynsha da ózara tıimdi yntymaqtastyq jónindegi baǵdardy qoldaý jáne ilgeriletýdiń mańyzdy ekenine senim bildirdi.
«Salalyq komıtetterdiń túrli mańyzdy máseleler boıynsha baılanystaryna qarqyn berý úshin konsýltatsııalar men ózge de sharalardy uıymdastyrýǵa bolar edi. Sonymen qatar, biz jumys baılanystaryn tereńdetý jáne parlamenttik qyzmet tájirıbesin zerdeleý úshin aldaǵy kezeńde onlaın jáne oflaın túrinde birlesken birqatar sharalar ótkize alar edik», - dedi Máýlen Áshimbaev.
Taraptar júzdesý barysynda parlamentshilerdiń ózara múddelestik turǵysynda keleshegi zor baǵyttardaǵy yntymaqtastyqty damytýǵa járdemdesý máselelerin de qarady.
Ol – energetıka, jeńil jáne aýyr ónerkásip, qurylys, kólik, farmatsevtıka, týrızm jáne aýyl sharýashylyǵy salalary bolyp otyr.
«Aýyl sharýashylyǵynda, onyń ishinde tabıǵı ónim óndirýde aýqymdy múmkindikter ashylyp jatyr. Qazaqstandyq senatorlar «Organıkalyq ónim týraly« zań jobasyn ázirlegen bolatyn. Qazirgi kezde bul naryqta uzaq merzimdi ósý úrdisi baıqalady. Qujatta osy saladaǵy fermerlerdi qoldaýdyń naqty sharalary kózdelip otyr. Qazaqstannyń agroónerkásip sektory sheteldik ınvestıtsııa úshin tartymdy bolady degen senimdemin. Sizdiń eldiń kásipkerlerin yntymaqtastyqqa shaqyramyz», - dedi Máýlen Áshimbaev.