Máýlen Áshimbaev: Ramazan – sabyrlyqtyń, meıirimniń jáne izgiliktiń aıy

NUR-SULTAN. QaAqparat – QR Parlamenti Senatynyń tóraǵasy Máýlen Áshimbaev qazaqstandyqtardy Ramazan aıynyń bastalýymen quttyqtady, dep habarlaıdy QazAqparat.

Quttyqtaýyn Senat tóraǵasy óziniń Facebook paraqshasynda jarııalady.

«Elimizdegi barsha musylman qaýymyn qasıetti Ramazan aıynyń bastalýymen shyn júrekten quttyqtaımyn!

Bul – sabyrlyqtyń, meıirimniń jáne izgiliktiń aıy. Osy kezeńde adamzatty yrys-yntymaqqa shaqyratyn rýhanı qundylyqtar keńinen dáripteledi. Otyz kún orazada qaıyrymdylyq tanytyp, muqtaj jandarǵa qoldaý kórsetý de ıgi dástúrge aınaldy.

Ókinishke qaraı, bıyl da Ramazan aıy búkil álemdi jaılaǵan pandemııa kezeńine tuspa-tus kelip otyr. Sondyqtan azamattarymyz qalyptasqan keıbir rásimderdi oryndaýda Qazaqstan musylmandary dinı basqarmasynyń usynymdaryna qulaq asqany jón. Bul rette halqymyz jaýapkershilik tanytady dep senemiz.

Nıet etken jandarǵa ustaǵan orazalaryńyz ben tilegen duǵa-tilekterińiz qabyl bolsyn deımin. Bereke-birligimiz arta bersin. Ár shańyraq shattyqqa kenelsin. Elimiz aman, jurtymyz tynysh bolsyn!»,-dep jazdy, Máýlen Áshimbaev.