Máýlen Áshimbaev: Prezıdent reformalarynyń basty maqsaty – ádiletti quqyqtyq memleket qurý
Іs-shara barysynda Ádiletti Qazaqstan qurý jolyndaǵy mańyzdy mindetter keńinen talqylandy, dep habarlaıdy QazAqparat QR Parlamenti Senatynyń baspasóz qyzmetine silteme jasap.
Palata tóraǵasy ótip bara jatqan 2022 jyl elimiz úshin tarıhı oqıǵalarǵa toly bolǵanyn aıtty.
«Qazaqstan damýdyń jańa kezeńine nyq qadam basty. Memleket basshysy Qasym-Jomart Kemeluly Toqaevtyń bastamasymen keshendi reformalar qarqyndy túrde júrgizilip jatyr. Bıyl elimiz úshin óte mańyzdy saıası oqıǵa – Prezıdent saılaýy ótti. Sondaı-aq Parlament konstıtýtsııalyq reformany zańnamalyq turǵydan qamtamasyz etý úshin birqatar zań qabyldady», – dedi Máýlen Áshimbaev.
Senat Spıkeri qazirgi tańda búkil álem almaǵaıyp kezeńdi bastan ótkerip jatqanyna nazar aýdaryp, osyndaı shaqta Prezıdent saılaýy elimiz úshin mańyzdy qadam bolǵanyn atap ótti. Sondaı-aq ol Memleket basshysy óz Joldaýynda Parlamenttiń rólin arttyrýdy mindet etip belgilegenin, osyǵan oraı jalpyhalyqtyq referendýmda Konstıtýtsııaǵa tıisti ózgerister engizilgenin tilge tıek etti.
«Prezıdentimiz elimizdiń saıası, ekonomıkalyq jáne áleýmettik damý basymdyqtaryn belgilep berdi. Onyń bári Memleket basshysynyń saılaý aldyndaǵy baǵdarlamasynda naqty kórsetilgen. Eń basty maqsat – zań ústemdigi saltanat qurǵan ádiletti memleket qurý. Osy jolda búkil qoǵam bolyp jumylyp, birlesip jumys isteý asa mańyzdy», – dedi Máýlen Áshimbaev.
Sonymen qatar Senat tóraǵasy qasiretti qańtar oqıǵasyna toqtalyp, jyl basynda táýelsizdik alǵaly buryn-sońdy bolmaǵan synaqpen betpe-bet kelgenimizdi aıtty. Memleket basshysynyń batyl ári ýaqtyly qabyldaǵan sheshimderiniń jáne halyqtyń qoldaýynyń arqasynda elimiz ol qıyndyqtardy eńsere bildi.
«Elimizde júrgizilgen konstıtýtsııalyq reformanyń mańyzy zor. Bılik tarmaqtary arasyndaǵy tepe-teńdik kúsheıe tústi. Memlekettik basqarý júıesiniń ashyqtyǵy men tıimdiligin qamtamasyz etýge basa mán berilýde. Konstıtýtsııalyq reformany iske asyrý maqsatymen tıisti Konstıtýtsııalyq zańdar qabyldandy. Bul rette adam quqyqtaryn qorǵaý ınstıtýttaryn jetildirýge úlken kóńil bólingenin atap ótken jón», – dedi Máýlen Áshimbaev.
Otyrys barysynda Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy Vladımır Volkov baıandama jasady. Ol óz sózinde quqyq salasyn jańǵyrtý máselelerine jáne Parlament jumysynyń Reglamentine engizilgen ózgeristerge keńinen toqtaldy.
Sondaı-aq is-sharada Keńes músheleri Qýanysh Sultanov, Muhambet Kópeev, Bektas Beknazarov, Svetlana Jalmaǵambetova, Rashıt Ahmetov, Serik Jaqsybekov, Sársenbaı Eńsegenov, Birǵanym Áıtimova, Ómirzaq Ozǵanbaev, Sergeı Plotnıkov jáne taǵy basqalary sóz sóılep, konstıtýtsııalyq reformany iske asyrý barysy jóninde óz pikirlerin bildirdi.
Foto: senate.parlam.kz