Máýlen Áshimbaev Polsha Senatynyń marshalymen kezdesti
Taraptar eki el arasynda joǵary deńgeıde senimdi dıalog ornaǵanyn jáne ony Qazaqstan men Polsha parlamentteriniń baılanystary boıynsha qoldaý men ilgeriletý de mańyzdy ekenin atap ótti.
«Qazaqstan Senaty Polsha Senatymen parlamentaralyq yntymaqtastyqty tereńdetýge múddeli bolyp otyr. Qazaqstan Parlamentiniń eki palatasynda Polshamen yntymaqtastyq jónindegi toptar jumys isteıdi. Polsha Parlamentinde Qazaqstanmen dostyq toby qyzmet etýde. Biz aldaǵy kezeńde túrli sıpattaǵy birlesken is-sharalar uıymdastyra alamyz. Bul bizdiń ózara ekijaqty is-qımylymyzǵa jańa serpin beretinine senimdimin», - dedi Máýlen Áshimbaev.
Palata tóraǵasy áńgime barysynda Qazaqstan Parlamenti Senatynyń qazirgi qyzmeti, atap aıtqanda, Memleket basshysynyń saıası reformalaryn iske asyrýǵa baǵyttalǵan zań shyǵarý jumystary týraly da aıtty.
«Bizdiń Palata Qazaqstan Prezıdenti Qasym-Jomart Toqaevtyń jańǵyrtý jónindegi kún tártibin sapaly zańdarmen qamtamasyz etýge basymdyq berip otyr. Onda eń aldymen, saıası júıeni odan ári demokratııalandyrý, onyń ashyqtyǵyn qamtamasyz etý, saıası básekelestikti arttyrý, azamattardyń quqyqtaryn iske asyrý úshin qajetti jaǵdaılar jasaý týraly aıtylyp otyr. Biz bul baǵytta zańdardyń aýqymdy toptamasyn qabyldadyq», - dedi Máýlen Áshimbaev.
Júzdesýshiler saýda-ekonomıkalyq yntymaqtastyqty, sondaı-aq agroónerkásip kesheni, kólik, logıstıka, farmatsevtıka, qurylys, mashına jasaý, týrızm jáne basqa da keleshegi zor salalardaǵy ekijaqty qatynastardy nyǵaıtýdaǵy parlamentshiler járdeminiń mańyzdylyǵyn atap ótti.