Máýlen Áshimbaev pen Baqyt Sultanov bes áleýmettik bastama nysandaryn aralaıdy

ASTANA. QazAqparat - «Nur Otan» partııasy Tóraǵasynyń Birinshi orynbasary Máýlen Áshimbaev pen Astana ákimi Baqyt Sultanov Prezıdenttiń bes áleýmettik bastamasy boıynsha salynyp jatqan nysandardy aralaıdy, dep habarlaıdy QazAqparat tilshisi. 

Bul týraly Máýlen Áshimbaev «Nur Otan» partııasy Astana qalalyq fılıalynyń kezekten tys XXVI konferentsııasynda málimdedi. 

«Baqyt Turlyhanulymen 3 qazanda Memleket basshysynyń bes áleýmettik bastamasy aıasynda turǵyzylyp jatqan nysandardy aralap, qandaı jobalardyń júzege asyrylyp jatqany jóninde jınalys ótkizemiz. Jalpy alǵanda, partııanyń qazirgi basty mindeti - osy jobalar men ózge de bastamalar arqyly Memleket basshysynyń senimdi tiregi bolyp, Qazaqstannyń jańǵyrýyna júıeli túrde qatysatyn strategııalyq kúshke aınalý. Bir jaǵynan ózgeristerdiń ıdeology atanyp, ekinshi jaǵynan sol ózgeristerge belsene qatysyp, qozǵaýshy kúshi bolýymyz kerek», - dedi M. Áshimbaev. 

Aıta keteıik, búgin «Nur Otan» partııasy Astana qalalyq fılıalynyń kezekten tys XXVI konferentsııasynda Astana qalasynyń ákimi Baqyt Sultanov fılıaldyń tóraǵasy qyzmetine saılandy.