Máýlen Áshimbaev partııa fılıaldarynyń kemshin tusyn atady

ASTANA. QazAqparat - Nur Otan partııasy tóraǵasynyń orynbasary Máýlen Áshimbaev ákimdikterdiń aıtqanyna kóne bermeý kerektigin jetkizdi. Sebebi fılıaldar tikeleı partııaǵa baǵynady jáne jergilikti jerde baqylaý sharalaryn belsendi túrde júrgizýi tıis, dep xabarlaıdy QazAqparat tilshisi.

«Máselen, Jaıyq ózenin alaıyq, jeltoqsan aıynan beri balyqtardyń jappaı qyrylýy tirkeldi. Qazir osy másele ózekti problemaǵa aınaldy. Balyqtyń biraz bóligi qyrylyp qaldy. Sonyń ishinde qoldan ósirilgen bekire tuqymdas balyqtar da bar. Bul - óte qymbat ónim. Sodan úlken shyǵyn keldi. Partııanyń Atyraý oblystyq fılıaly bolsa, osy máseleni memlekettik organdarǵa jetkizip, sarapshylardyń kómegimen naqty sebebin izdeýdiń ornyna ortalyqqa «bári jaqsy» dep xat jazyp otyr. Senbilik kezinde bárin tazartyp tastaımyz, deıdi. Ondaı xat-xabarlardyń qajeti qansha? Máseleni sheshýmen aınalysý kerek. Aımaqta problema bolsa, ony der kezinde kóterip, memlekettik organdarǵa jetkizý kerek», - dedi M.Áshimbaev búgin ortalyq apparatta ótken jıynda. Al aımaqtyq fılıaldar onlaın rejimde balanysqa shyqqan bolatyn.

M.Áshimbaevtyń aıtýynsha, «Halyqqa kómek» jobasy aıasynda jergilikti máselelerdi jyldam sheship otyrý qajet. Osy jumysqa qoǵamdyq qabyldaýlar da, arnaıy baqylaý toptary da atsalysatyn bolady. Memlekettik organdar naqty jumysty qolǵa alǵansha monıtorıng júrgiziledi.
«Atyraýdaǵy jaǵdaı anyq bir nárseni kórsetti. Bizdiń fılıalymyz ortalyqqa anyqtama jazǵannan basqa máseleni der kezinde kótergen joq, onyń sheshilýine de atsalyspady. Al áleýmettik jeliler shýlap jatyr. Memlekettik organdar da ol máseleni talqylap jatyr. Partııanyń fılıaly bolsa, ortaq sharalarǵa qatyspaǵan. Atyraý fılıaly, sizder maǵan renjimeńizder. Men qatty aıtqan shyǵarmyn. Biraq jergilikti jerde problema bolsa, bizdiń fılıaldarymyz ún-túnsiz otyrmaýy qajet. Ortalyqtyń buıryǵyn kútpeńizder. Ózderińiz ózekti degen máselelerdi kóterińizder, áleýmettik jeli arqyly jetkizińizder. Biz sonyń bárin aıtpasaq, kináli adamdardy jaýapqa tartsyn dep, talap qoımasaq, fılıaldarynyń qajeti qansha? Bári jaqsy, baqylaýda ustap otyrmyz dep, bizdi jubatýdyń qajeti joq. Sizder ákimdiktiń bir qurylymy emessizder, Elbasy partııasynyń bir bólshegi bolyp sanalasyzdar. Biz xalyqtyń ál-aýqatyn kóterýge jumys isteýimiz kerek», - dep atap kórsetti M.Áshimbaev.

Osy oraıda aldaǵy sý tasqyny máselesin jiti baqylaý qajettigin jetkizdi. Partııa fılıaldary jergilikti jerde sý tasqynyna qarsy sharalar durys atqarylmasa, ony der kezinde tıisti memlekettik organdarǵa jetkizý kerek.
Aıta keteıik, kúni keshe QR Іshki ister mınıstrligi birneshe 100-ge jýyq eldi mekenniń ákimderine eskertý jasaǵanyn málimdedi. Sebebi atalǵan atqarýshy organdar sý tasqynyna durys jaıyndalyp jatqan joq.
«Máselen, Іshki ister mınıstrliginiń jergilikti qurylymdary eldi mekenderdiń 88 ákimine eskertý jazyp berdi», - deıdi vıtse-mınıstr ıÝ.Ilın.