Máýlen Áshimbaev Ózbekstan Olıı Majlısiniń Zań shyǵarý palatasynyń Tóraǵasymen kezdesti

NUR-SULTAN. QazAqparat - Qazaqstan Parlamenti Senatynyń Tóraǵasy Máýlen Áshimbaev Ózbekstan Respýblıkasy Olıı Májilisi Zań shyǵarý palatasynyń Tóraǵasy Nýrdınjon Ismoılovpen kezdesti, dep habarlaıdy QazAqparat joǵary palatanyń basspasóz qyzmetine silteme jasap.

Kezdesý barysynda Máýlen Áshimbaev eki eldiń memleket basshylary Qazaqstan men Ózbekstan arasyndaǵy yntymaqtastyqty belgilep bergenin, ony joǵary deńgeıdi zańnamalyq organdardyń baılanystary arqyly ári qaraı damytýdyń mańyzdy ekenin atap ótti.

«Bizdiń Prezıdentterimizdiń arqasynda Qazaqstan men Ózbekstan arasyndaǵy strategııalyq yntymaqtastyq dáıekti damyp keledi. Bul rette parlamentaralyq dıalogtyń mańyzy zor. Sondyqtan Parlamentterimizdiń ózara baılanysy turaqty jáne damý sıpatyna ıe boldy. Eki memleket basshylarynyń ýaǵdalastyǵy nátıjesinde qurylǵan Parlamentaralyq yntymaqtastyq keńesi de ekijaqty parlamentaralyq baılanystardy damytýǵa qosymsha serpin beredi», – dedi Máýlen Áshimbaev.

Óz kezeginde Ózbekstan Olıı Májilisi Zań shyǵarý palatasynyń Tóraǵasy Qazaqstan Prezıdenti bastamashy bolǵan reformalardy Ózbekstan tarapy quptap otyrǵanyn atap ótti. Ol sondaı-aq Qasym-Jomart Toqaevtyń kóptegen bastamalary tek Qazaqstanǵa ǵana emes, búkil Ortalyq Azııa óńiri úshin mańyzdy ekenine toqtaldy. Nurdınjon Ismoılov Parlamentaralyq yntymaqtastyq keńesi Qazaqstan men Ózbekstan arasyndaǵy ózara qarym-qatynastardy nyǵaıtýǵa eleýli úles qosatynyna senim bildirdi.

Kezdesý barysynda ekijaqty sıpattaǵy yntymaqtastyq halyqaralyq alańdardaǵy, onyń ishinde TMD PAA aıasyndaǵy ózara is-qımylmen tolyqtyrylyp, kúsheıtiletini atap ótildi. Máýlen Áshimbaev bıylǵy 28-29 naýryzda Almaty qalasynda TMD elderi Parlamentteri basshylarynyń jáne birqatar halyqaralyq parlamenttik uıymdardyń qatysýymen ótetin TMD PAA Keńesiniń mereıtoılyq otyrysy ózara qarym-qatynastardy odan ári damytýǵa serpin beretinin aıtty.